Европын хамгийн том алмаз Архангельск мужаас олджээ

Европоос олдсон хамгийн томд тооцогдож, 222,09 каратын алмаз ОХУ-ын Архангельск мужийн В.Грибийн нэрэмжит уурхайгаас олдсон тухай ТАСС агентлаг мэдээллээ. 
“Энэ бүс нутаг төдийгүй Европын алмаз олборлолтын түүхэн дэх хамгийн том, 222,09 каратын жинтэй алмаз олдсон. Үүнийг олохоос өмнө хамгийн том үнэт чулуу нь  мөн л энэ ордоос олсон 181,68 каратын алмаз  байсан бөгөөд энэ чулуунд “Архангел Михаил” гэдэг нэр өгсөн. Энэ удаад олдсон чулуунд мөн нэр өгнө” гэж уурхайн хэвлэлийн алба мэдэгджээ. 

Энэхүү хамгийн том алмазаас гадна, энэ уурхайд нэн ховор нимбэгний өнгөтэй, гоёлын зориулалтаар ашиглах 47.61 каратын алмаз олдсон байна. 
ТАСС агентлагийн мэдээлснээр дээрх чулуунуудыг Израиль, Бельги зэрэг томоохон худалдан авагчтай дэлхийн зах зээл дээр худалдахаар болжээ. 
Архангельск мужийн Мезенск районд байх алмазын орд гзар нь дэлхийд томоохонд тооцогддог бөгөөд нөөцөөрөө Орост дөрөвдүгээрт, дэлхийд долоодугаарт бичигддэг юм байна. 
Дашрамд дуулгахад,  алмаз нь байгаль дахь хамгийн хатуу материал  бөгөөд онцгой хатуулаг болон оптикийн тунгалаг шинжээрээ үйлдвэрлэл, гоёл чимэглэлийн үнэт түүхий эд болдог. 
Дэлхийн хэмжээнд жилд ойролцоогоор 9 тэрбум ам.доллараар үнэлэгдэх 130 сая карат буюу 26,000 кг байгалийн алмаз олборлодог бол 100,000 кг хиймэл алмаазыг лабораторийн нөхцөлд ургуулдаг байна. 

Г.Бямбасүрэн