“Orano Mining”-ийн хөрөнгө оруулалтын гэрээг УИХ-ын намрын чуулганаар өргөн барина

Эрчим хүч, татвар, лиценз олголт, төсвийн зардал зэрэг 14 чиглэлд реформ хийнэ
Засгийн газрын ээлжит хуралдаанаар “Orano Mining” компанийн хөрөнгө оруулалтын гэрээг УИХ-ын намрын чуулганаар өргөн барихаар төлөвлөснийг мэдээлэв.

Талууд гэрээний 200 орчим санал дээр тохиролцсон байна. Хараахан тохиролцоонд хүрээгүй байгаа зургаан санал дээр Монголын тал байр сууриа илэрхийлжээ.

Монголын тал өсөн нэмэгдэх АМНАТ дээр инфляц тооцох, байгаль орчны эрсдэлээс хоёр тал хамтран хариуцлага хүлээх зэрэг асуудалд голлон анхаарч байгаа аж. Олборлолтыг 20 жил, нөхөн сэргээлтийг 10 жилийн дотор хийхээр төлөвлөж байна. Одоогийн гэрээний төсөл нь 51 хувь дээр харилцан ойлголцолд хүрээд байгаа бөгөөд хэлэлцээр ирэх аравдугаар сард нэг талдаа гарахаар байгааг ЗГХЭГ-ын дарга хэллээ.

Тус хөрөнгө оруулалтын гэрээн дээр гурван олон улсын зөвлөх үйлчилгээний компани ажилласан байна.

Үүнээс гадна Засгийн газрын ээлжит хуралдаанаар мөрийн хөтөлбөртөө тусгаад буй 14 мега төслийг хэрэгжүүлэхээс гадна 14 чиглэлд реформ хийхээр төлөвлөж байгааг мэдээллээ. Тодруулбал: Төрийн өмчит компаниудын засаглалыг сайжруулахаар засаглалын реформ хийнэ. Мөн татварыг зөвхөн төсөв бүрдүүлэхээс илүү нийгмийн харилцааг зохицуулах талаас нь шинэчлэхийг зорьж байна.

Үүнээс гадна эрчим хүч, ашигт малтмалын лиценз олголт,төсвийн зардал, хүний эрх, хөдөлмөрийн зах зээлийг шинэчлэх зэрэг чиглэлд реформ хийхээр төлөвлөж буйг танилцууллаа.