Зүрхний төрөлхийн гажигтай хүүхдүүдэд үнэгүй мэс засал хийж байна

Гуравдугаар төв эмнэлэгт  энэ сарын 7-ноос 12 сарын 12 -ны өдрүүдэд БНСУ-ын Сөүлийн Үндэсний Их Сургуулийн Хүүхдийн эмнэлгийн зүрхний мэс засалч Ким Вүүн Хан профессороор ахлуулсан зочин профессорын баг хүрэлцэн иржээ. Тус эмнэлгийн хүүхдийн зүрхний мэс заслын багтай хамтран ажлын байрны мэс засал сургалт зохион байгуулж, зүрхний төрөлхийн хавсарсан хүнд гажиг оношлогдсон бага насны хүүхдүүдэд хамтарсан багаар мэс заслын тусламж үйлчилгээг үнэ төлбөргүй үзүүлж байна.

Монгол улсад хүүхдийн зүрхний төрөлхийн гажгийн мэс заслын тусламж үйлчилгээний чанар хүртээмжийг сайжруулах, эмч эмнэлгийн мэргэжилтнээ ажлын байранд нь сургаж чадавхжуулах чиглэлээр БНСУ-ын Сөүлийн үндэсний их сургуулийн Анагаах ухааны сургуулийн эмнэлэг, JW LEE Даяаршлын Анагаах Ухааны Төвтэй хамтран ажиллах гэрээг 2013 оноос эхлэж байгуулан 11 жилдээ үр дүнтэй хамтын ажиллагааг хөгжүүлж байна.

Энэ удаагийн зочин профессорын багийн үйл ажиллагаагаар бага насны хүүхдийн зүрхний төрөлхийн хавсарсан, хүнд гажиг бүхий эмгэгүүдийг төгс засах мэс засал болон зүрхний хавхлагын төрөлхийн эмгэгтэй хүүхдүүдэд насанд хүрсэн хойно нь ч хавхлагын үйл ажиллагаа нь удаан хугацааны туршид хэвийн хадгалагдах мэс заслын аргуудад дотоодын эмч мэргэжилтний багийг чадавхжуулж байгаагаараа ихээхэн ач холбогдолтой болж байна.