Цахимаар залилан үйлддэг этгээдүүд иргэдийн мөнгийг крипто валют болгон хувиргадаг байна
Нийгмийн сүлжээ хөгжихийн хэрээр цахимаар залилах гэмт хэрэг нэмэгдэж байгааг Цагдаагийн байгууллагаас мэдээлж байгаа юм. Үүнийг дараах тоон мэдээллээс харж болно. Тодруулбал, Монгол Улсад 2015 онд цахим залилангийн 17 тохиолдол бүртгэгдэж байжээ. Гэтэл энэ оны эхний есөн сард 9755 гэмт хэрэг бүртгэгдэж, иргэдэд 53 тэрбум төгрөгийн хохирол учруулсан байна.
Цахим орчинд гэмт хэрэг үйлдэж буй этгээдүүд ихэвчлэн хохирогчдын мөнгийг богино хугацаанд гадаад улс руу шилжүүлэн крипто валют болгон хувиргадаг байна.
Өнөөдрийн байдлаар иргэдэд учирсан хохирлын мөнгөн дүнгээс гэмт этгээдүүд гурван тэрбум орчим төгрөгийг дэлхийн крипто валютын арилжааны биржүүд рүү дундын зуучлагчдын дансаар дамжуулан крипто валют болгон гадаад крипто хэтэвч рүү шилжүүлсэн байж болзошгүй байгааг албаныхан хэлэв.
Цагдаагийн байгууллагад цахим орчинд бусдад эд хөрөнгөө залилуулж хохирсон иргэдээс 1,500 иргэн шуурхай дуудлага мэдээлэл өгсний дагуу өнөөдрийн байдлаар 11 тэрбум 123 сая төгрөгийн шилжилт хөдөлгөөнд хязгаарлалт тогтоожээ.
Иймд цахим орчинд аливаа хэлбэрээр үйлдэгдэж буй залилах гэмт хэрэгт өртөж, хохирсон тохиолдолд цагдаагийн байгууллагын 102 болон 51265666 дугаарын утсанд яаралтай хандахыг зөвлөж байна. Учир нь цагдаагийн байгууллагын алба хаагчид таны өгсөн дуудлага мэдээллийн дагуу шуурхай хариу арга хэмжээ авч, шилжин орсон сэжигтэй дансны шилжилт хөдөлгөөнд хязгаарлалт тогтоох боломжтойг Цагдаагийн Ерөнхий Газраас мэдээлэв.
