МИАТ ашигтай л ажиллаж байвал хэрэглэгчдийн эрх ашиг огт хамаагүй юу?
МИАТ-ийг сонгоод очсон хэрэглэгч энэ салбараар үйлчлүүлж, билет захиалах гэснийхээ шанд машинаа ачуулах тохиолдол жирийн үзэгдэл юм. Учир нь машины зогсоол байдаггүй. Машинаа ачуулчихгүйн тулд хойд талд нь байрлах Баянголын зогсоолд машинаа тавих хэрэг гардаг. Тэгэхдээ 2 мянган төгрөг нэхүүлдэг. Энэ салбарт Бизнес өрөө гэж байдаггүй. Сувенир шоп байхгүй. Хоёрдугаар давхарт байрладаг тул шатаар нь гарахад хөгжлийн бэрхшээлтэй иргэн, тэргэнцэртэй иргэдэд хүндрэл учирдаг. Тэдэнд зориулсан зориулалтын зам байдаггүй. Ер нь билетийн касс нь 1 дүгээр давхартаа байж болдоггүй юм уу. Заавал ингэж иргэдэд хүндрэл учруулж, үйлчилгээ үзүүлж буй нэрийдлээр тэднийг шийтгээд байж болохгүй баймаар.
Уг нь дэлхийн хандлагыг харж байхад иргэний агаарын тээвэр нь бусад эдийн засгийн салбартай харьцуулахад байнга түрүүлж хөгжиж явдаг юм билээ. Агаарын тээврийн бизнес бол зөвхөн тухайн улсад үйл ажиллагаа явуулдаггүй. Бусад улс орнуудад хил дамнан үйл ажиллагаа явуулж байдаг.
Тэр ч утгаараа хэрэглэгчдийн эрх ашгийг хамгийн нэгдүгээрт тавьж үйлчилгээ үзүүлдэг. Хэрэглэгчдийн эрх ашиг гэдэг ойлголт тухайн иргэн онгоцонд суухад л хамаатай юм биш. Жишээ нь иргэн би МИАТ-ийг сонгож, үйлчилгээнийх нь салбарын үүдийг нээж орсон тэр үед миний эрх ашгийг тэд хүндлэх ёстой юм. Үүнийг л МИАТ-ийн удирдлагууд ойлгох хэрэгтэй байна.
МИАТ эрхэм зорилгоо тодорхойлохдоо, "Найдвартай, чанартай, үр өгөөжтэй агаарын тээврийн үйлчилгээгээр Монголыгдэлхийтэйхолбосон үндэсний тэргүүлэгч компани байна” гэдэг юм билээ. Алсын хараагаа "Олон улсад хүлээн зөвшөөрөгдсөн Монголын үндэсний агаарын тээвэрлэгч байх” гэсэн байна лээ.
Тэгвэл энэ мэт тэнгэрлиг зорилго чиглэлийг хөрсөн дээр буулгахын тулд үйлчилгээний байгууллага гэдгээ ухамсарласан үйл ажиллагаа явуулаач ээ гэж хэлмээр байна.
Дэлхийн авиакомпаниудыг үйлчилгээ, чанар, стандартаар тодорхой түвшинд авч үздэг. МИАТ-ийн тухайд үйлчилгээний түвшин таван одын зэрэглэлээр гурван одын түвшинд явж байгаа гэж экс захирал Ц.Орхон хэлж байсан. Тэрчлэн үйлчилгээг сайжруулах, стандартыг мөрдөх чиглэлээр дэлхийн таван одтой авиакомпаниудын үйлчилгээний түвшинд очих зорилгыг МИАТ өмнөө тавьсан гэж байсан даа. Ажилтнуудынхаа зан харилцааны соёл, хувцсыг шинэчлэх, өөрчлөх, хоол ундыг чанаржуулах гээд зөндөө ажил байгаа гэж байсан юм. Тэгвэл дээр нь нэмээд хийх ажил МИАТ-д зөндөө байна.
Баянголын урдах энэ төвийнхөө үйл ажиллагаанд нэн тэргүүнд анхаармаар байна. Дотоод, гадаадын олон иргэд үйлчлүүлдэг газар ийм байж үнэхээр боломгүй. Ашиг орлого сайтай л байгаа бол хэрэглэгчдийн эрх ашигт нийцсэн үйлчилгээндээ улам л илүүтэй анхаармаар юм. Үйлчилгээгээ зарж байж л ашиг олох ёстой биз дээ. Гэтэл бид л монополь, биднээр л үйлчлүүлэх юм чинь гэсэн шиг ийм даварсан хандлагатай байж байдаг. Хэрэг алга байна даа, МИАТ-ийнхаан.
Tumen.mn
