Хүүхдийн бөөр өвдөх нь ийм олон шалтгаантай байдаг байх нь...

            Эх хүүхдийн эрүүл мэндийн үндэсний төвийн хүүхдийн эмнэлгийн бөөрний тасагт  жилд дунджаар 500-600 хүүхэд хэвтэн эмчлүүлдэг байна.

Бөөрний олон төрлийн эмгэг байдгаас бага насны хүүхдэд илүүтэй тохиолддог нь нянгийн гаралтай халдвар гэнэ. Энэ нь хүүхдийн биеийн эсэргүүцэл, хувийн ариун цэвэртэй холбоотой болохыг эмч хэлж байна.Өөрөөр хэлбэл гүйлсэн булчирхай ойр ойрхон  үрэвсэх, амны хөндийн эрүүл ахуй алдагдсанаас хүүхдийн бөөрөнд нянгийн халдвар дамждаг байна. Мөн эмийн замбараагүй хэрэглээ,  буруу хооллолт зэрэг нь хүүхдийн бөөрийг өвчлүүлэх шалтгаан болдог. Хүүхдээ дулаахан хувцаслаж, аль болох давсархаг даршилсан бүтээгдэхүүн хүнсэндээ хэрэглэхээс татгалзах нь зүйтэй. Бид хүүхэддээ чихэртэй цай, хийжүүлсэн ундаа өгөх нь элбэг. Мөн жимсний жүүс, даршилсан ногоог ч хүнсэндээ түлхүү хэрэглэдэг. Эм ч мөн ялгаагүй. Дархлааг дэмжих амин дэмийг эмчийн зааваргүй удаан хугацаагаар хэрэглэх нь хүүхдийн бөөрөнд муугаар нөлөөлдөг байна.  

 Нянгийн гаралтай бөөрний эмгэгээр ихэвчлэн бага насны охид өвддөгийг мэргэжлийн эмч онцоллоо. Энэ нь эрүүл ахуйн дэглэмтэй холбоотой. Өөрөөр хэлбэл бэлгийн эрүүл ахуй алдагдсанаас охидын үтрээ үрэвсэж улмаар өгсөх замын халдвар болж бөөрийг өвчлүүлдэг байна. Мөн цагаан хорхой нь нянгийн халдвар дамжих нэг нөхцөл болдогийг эмч хэллээ.

Бөөрний эмгэгийг аль болох эрт илрүүлбэл сайн. Харамсалтай нь манай аав ээжүүд өвчин хүндэрсэн үед л эмчид хандах нь цөөнгүй.  Жишээ нь хүүхдийн бие бүхэлдээ хавагнаж бүр цустай шээх үед эмнэлэгт ханддаг байна. Энэ нь аав ээж бидний  эрүүл мэндийн мэдлэг дутмаг хүүхэддээ тавих анхаарал халамж сул байгаатай холбоотой гэж эмч хэлж байна.

Сайн анзаарвал бөөрний эмгэгийн эхэн үед хэд хэдэн шинж тэмдэг ажиглагддаг. Тухайлбал шээс багасах, их бага хэмжээгээр хавагнах, ам нь цангах, арьс хуурайших, загатнах, хамар амнаас цус гарах, хоолондоо муудах,  амнаас эхүүн үнэр гарах зэрэг шинж тэмдэг илэрдэг. Эдгээр шинж тэмдэг өөр өвчний үед ч илэрч болно. Бөөрний эмгэг үү эсвэл өөр өвчний шинж тэмдэг үү гэдгийг мэргэжлийн эмч тодорхойлно гэдгийг аав ээжүүд анхаарах учиртай.

Хамгийн гол нь бид хүүхдийнхээ биед илэрч байгаа ямар нэгэн өөрчлөлтийг анзаарч байх хэрэгтэй. Өглөө оройдоо хүүхдийнхээ шээсийг ажиглаж байх нь бөөрний эмгэгийг эрт илрүүлэх нэг арга юм. Учир нь хүүхдийн шээс тундастай байх нь бөөрний эмгэгийн үед илэрдэг хамгийн энгийн шинж тэмдэг юм. Хэрвээ хүүхдийн тань шээс өтгөн цагаан тундастай байвал эмнэлэгт хандаж зөвлөгөө авах нь зүйтэй. Ямар ч өвчнийг эрт зөв оношлох нь л чухал. Хэдий чинээ эрт оношилно тэр хэрээр түргэн эдгэрнэ. Хүүхдийнхээ биед ямар нэгэн өөрчлөлт гарсан үед эмчид яаралтай хандаж зөвлөгөө тусламж авч хэвшицгээе.