Туул голоос хайрга олборлохыг хориглов
Нийслэлийн Засаг дарга С.Батболд өнөөдөр /03.29/ нийслэлийн нутаг дэвсгэр дэх түгээмэл тархацтай ашигт малтмалын ашиглалтын үйл ажиллагаа, байгаль орчинд үзүүлж буй сөрөг нөлөөллийн талаар мэдээлэл өглөө. Энэ үеэр нийслэлийн бүтээн байгуулалтад голын хайрга биш, уулын дайрга ашиглана гэдгээ мэдэгдсэн байна. Мөн түгээмэл тархацтай ашигт малтмалын ашиглалтын үйл ажиллагаа явуулахдаа байгаль орчны нөхөн сэргээлтээ хийгээгүй, хууль зөрчиж байгаа аж ахуйн нэгжийн үйл ажиллагааг бүтээн байгуулалтын улирал эхэлж байгааг үл харгалзан зогсоож, тусгай зөвшөөрлийг нь цуцална гэдгийг хотын дарга мэдэгдсэн байна.
