3 жил гацсан ГССҮТ-ийг “Содон” хороололтой холбох авто зам энэ онд ашиглалтад орно

ГССҮТ-ийг “Содон” хороололтой холбох авто зам ашиглалтад оролгүй гурав дахь жилдээ оров. Тус замыг хэзээ ашиглалтад орох болон одоогоор хэдэн хувьтай гүйцэтгэгдэж байгаа талаар албаныхнаас тодрууллаа.

Зам замын байгууламжийн төслийн захирал А.Ербол, "Одоогоор суурь ажлууд хийгдээд дуусссан. Энэ жил бүрэн ашиглалтад оруулахаар ажиллаж байна. Ер нь бол энэ тойрог замуудыг хурдны зам гэж нэрлэж байгаа. Энэ замтай хэд хэдэн зам холбогдох юм. Ингэснээрээ замын ачаалал багасна гэж үзэж байна" гэлээ.

Улаанбаатар хотын авто замын түгжрэлийг бууруулах ажлын хүрээнд 13 байршилд шинээр холбоос зам хийж буй. Үүний нэг болох Толгойтын замыг Ард Аюушийн өргөн чөлөөтэй буюу Гэмтлийн эмнэлэг /ГССҮТ/-ийг “Содон” хороололтой холбох гүүрэн байгууламж, таван нүхэн гарц бүхий 3.9 км авто замын ажил гурав дахь жилээ үргэлжилж байгаа юм.

Тус бүтээн байгуулалтын газар чөлөөлөлтийн ажил 2022 оноос эхэлж, өнгөрсөн жил бүрэн дууссан. Уг замын байгуулахын тулд нийт 356 нэгж талбарыг чөлөөлсөн байна.

Энэ зам ашиглалтад орвол нэгдүгээр хорооллын урд талын болон 21 дүгээр хороолол руу чиглэсэн замын ачаалал эрс багасах боломжтой гэж тооцоолж буй. Нэмээд зам дагуух айлуудын газрын үнэ өсөж, нийтийн тээврийн хүртээмж сайжирч, худалдаа үйлчилгээ, бизнесийн орчин бий болно гэсэн өндөр хүлээлттэй байна.