УИХ-ын гишүүн Ц.Гарамжав та өрөө төлнө үү
Энэ оны гуравдугаар сард Монгол улс олон улсын санхүүгийн зах зээл дээрээс "Чингис, Самурай бонд” хэлбэрээр босгосон валютынхаа хүүг төлж өр төлөх эхний үүргээ "Амжилттай” биелүүлнэ. Харамсалтай нь энэ нь "Мөрөөдөл” бололтой. Монгол улс өнөөдрийн байдлаар Хятад, Орос, Япон, Солонгос, Эмират зэрэг улсуудаас зээл авах хүсэлтэй байгаагаа удаа дараа илэрхийлэн, хэн нэг нь нааштай хариу өгөх учиртай хэмээн горьдон суугаа бололтой.
Хэрвээ Монгол улсын Засгийн газраас баталгааг нь гарган байж Олон улсын санхүүгийн зах зээл дээрээс Хөгжлийн банкаар дамжуулан босгосон энэхүү бондын зээлээ Ж.Эрдэнэбатын Засгийн газар төлж чадахгүй бол, нөгөө та бидний эчнээгээр танидаг болсон "Стэндбай” гэдэг үг маань "Деполд” гэдэг дараагийн утга агуулга руугаа нэгмөсөн шилжиж, Монгол улсын Засгийн газрын нэр хүнд олон улсын санхүүгийн зах зээл дээр "Анхаар! Найдваргүй зээлдэгч” нэрээр бичигдэж эхлэх нь ээ.
Улсаа өрөөс тэглэх ямар гарц байна вэ. Дайны дараахан Солонгосчууд улсаа хямралаас гаргахын тулд хүн бүр өөрт байгаа үнэтэй бүхнээ хандивлаж байсан гэдэг. Бид ч ялгаагүй болохгүй гэх зүйл байхгүй. Гэвч хандив тусламжийг бүртгэж улсдаа тушаах үнэнч албат төрд байгаа болов уу. Тушаасан хөрөнгийг улс хүүхдийн мөнгөндөө ч болтугай зарцуулж чадах болов уу. Эсвэл хэн нэгэн албан тушаалтны бинзений мөнгө болоод хувирчих болов уу. Хэнд итгэх вэ.
Хөгжлийн банкны бодлогогүй гаргасан зээлээс үүдэлтэй Бондын өр төлбөрийг хэрхэн хаанаас мөнгө олж, хугацаанд нь яаж төлөх вэ хэмээн Засгийн газар нь, УИХ-ын дарга нь улс дамжин гуйлга гуйж явахад, энэ банкнаас зээл авч бизнесийн цар хүрээгээ өргөжүүлэн, бидний хэлдгээр "ТОМОРЧИХСОН” хүмүүс "ТАГ ДУУГҮЙ” байсаар байна. Сураг сонсох нь ээ тэдэнд авсан зээлээ найдваргүйд тооцуулж, улмаар эрсдлийн санд оруулан хаадаг башир арга байдаг бололтой.
Ц.Гарамжаваа өөрийг чинь л хэлээд байна!
Хөгжлийн банкнаас 110 тэрбум төгрөгийн зээл авч бизнесээ өргөжүүлж чадсан сүйхэйтэй нэгэн. Эрчүүд голдуу ноёлдог бизнест хүч үзэн хөдөлмөрлөж, амжилт гаргаж чадсан эмэгтэй. Энэ эмэгтэйгээр бахархах хүмүүс цөөнгүй. Гэхдээ олон хүмүүсийн итгэлийг алдах муухай болов уу. Улаанбаатар Буянгаас хойш явах зам дагуу замын зүүн гар талд "MPM” /Монполимент/ хаягтай 16 давхар сүрлэг том барилга баригдаж дуусаад, дөнгөж ашиглалтанд орж байгаа бололтой. Өөрийн бизнесээ өргөжүүлж, хөрөнгө мөнгөө арвижуулж, цулайтал баяжихыг чинь хэн ч буруутгахгүй байх.
Гэхдээ ЗЭЭЛЭЭ ТӨЛ!!!
Зээлээ төлөхгүй эрсдлийн сан гээчид нь оруулж, хаахаар үхэн хатан зүтгээд байгаа чинь, ёстой даварсан үйлдэл. Ард түмнээсээ ичих хэрэгтэй. Таныг давраах гэж ард түмэн төрийн суудалд суулгаагүйг бүү март!
Хөгжлийн банкны гүйцэтгэх захирлаар ажиллаж байсан Н.Мөнхбат гэгч залуу аавын хаалга татах нь. Эрх мэдлээр дулдуйдсан хэдэн нөхдүүдийн сарвайсан хэдхэн төгрөгийг кармаалж, бусармаг үйлдлийн бамбай болон хэсэг гүйснийхээ төлөө муу нэртэд нэг хэсэгтээ суух нь. Нэг ёсондоо золионд явах нь. "АРД ТҮМЭН” минь . Энэ мэтчилэн төрийн түшээд, тэднийг тойрон хүрээлэгчдийн гарын салаагаар улсын хөрөнгө мөнгө зүй бусаар урсан алга болоод байгааг зогсоох хэрэгтэй.
А.Бадамцэцэг Mongolcomment.mn
.png)
