Гарьд Ө.Бат-Орших наадмаар барилдахгүй

Ардын хувьсгалын 97 жилийн ойн баяр наадам эхлэхэд ганцхан өдөр үлдлээ. Баяр наадмын бөхийн бүртгэл ид үргэлжилж байна. Дөнгөж саяхан улсын гарьд Ө.Бат-Орших өөрийн цахим хуудсаараа олон түмэнд хандан мэдэгдэл хийснийг хүргэе.

Тэрээр мэдэгдэлдээ: “Монголын нийт ард түмэн, тэр дундаа монгол бөхийн үнэнч үзэгч, бөхийн хорхойтнууддаа миний бие энэ жил буюу АХ-ын 97 жилийн ой, Үндэсний их баяр наадмаар барилдахгүй болсноо мэдэгдэж байна. МҮБХ нь надаас ямар нэг тайлбар авахгүйгээр, өөрт мэдэгдэлгүйгээр 'барилдах эрх' хаслаа хэмээн фэйсбүүк болон олон нийтийн мэдээллийн хэрэгслээр зарласан. Энэ асуудлаар БЗД ийн ИХАШШүүх барилдах эрх хассан нь хууль бус гэдгийг тогтоосон шүүхийн тогтоол, шүүхийн шийдвэр биелүүлэх шүүгчийн захирамж, шүүхийн шийдвэр гүйцэтгэх хуудас гаргаад байгаа билээ. Хэдийгээр шүүхээр миний барилдах эрх сэргэсэн ч монгол төрийн наадам элдэв үймээнгүй, хэрүүл будлиангүй сайхан болж, монгол түмэн минь эвдрэл, хагарал, талцалгүй сайхан наадаасай гэж хүсэж энэ жил үзэгчийн суудлаас наадам үзэхээр шийдлээ. Намайг дэмжиж, харж, хүлээж суусан дэмжигч олон түмнээсээ хүлцэл өчье. Монгол түмэн минь магнай тэнэгэр сайхан наадаарай. Бид эвтэй байхдаа дийлдэшгүй байсныг түүх гэрчилнэ” гэв.

Түүний олон мянган дэмжигчдийн урмыг хугалсан мэдэгдэл болох нь мэдээж. Ямартай ч энэ жилийн наадмаар тэрээр барилдахгүй болсон нь тодорхой боллоо.

Л.Сайнбаяр