Хардалт гэдэг хагас эрүүл хүний өвчин

 

Хүмүүс хайртай бол хартай хэмээн өөрийнхөө хий хоосон хардах, өөрийн амьдралын хань болно хэмээн итгэл сэтгэлээр нэгдсэн хүнээ хүртэл хардаж харамлаж эхэлдэг. Харин үүнийгээ болохоор эвтэйхэн шиг л аргална. Хайртай болохоороо л гээд…Гэтэл хайр гэж чухам юу юм бэ гэдгээ ойлголцоогүй болоод л хардах хэмээх сэтгэцийн өвчинд ээрэгдэн өөрийгөө болон хажуудахаа сэтгэлийн дарамтанд оруулж буйгаа хүмүүс бид мэддэггүй.

Тийм ч учраас хардалтыг эрдэмтэд судлаачид "хагас эрүүл хүний л зан” хэмээн тодорхойлсон байна. Хэт хардалт нь олон уршиг дагуулдаг.

- Хартай хүний эхнэр (нөхөр) эцсийн эцэст найз нөхөдгүй, гэрээр нь шагайх хүнгүй, хүнтэй ч мэндлэх эрхгүй болно. Хардаад байдаг болохоор таньдаг хүнтэйгээ ч тааралдахаас яс хавтас хийнэ.

- Байнга хардаж сэрдүүлэн, түгшиж, айж сандарч явснаар мэдрэл нь сульдаж, сэтгэлийн өвчтэй ч болж болно.

- Хардалт сексийн харьцаанд сонирхолгүй болгож, дур нь хөрөх байдал үүсгэдэг. Хардалт бол эмэгтэйн бэлгийн дур хөрөх нэг гол шалтгаан юм. Иймд эхнэрээ "мөсөн” хүн болгочихгүй гэвэл хэт хардалт огт хэрэггүй.

- Хэт хардалт даамжирсаар сэтгэцийн өвчин эмгэгт ч хүргэж болно. Хардалт улмаас ноцтой гэмт хэрэг өдүүлсэн тохиолдол ч цөөнгүй.

- Хэт хартай хүн хажуудахаа байнгын дарамтанд байлгадаг. Хардалтаас үүссэн хэрүүл маргаанд хүүхдийн хүмүүжилд ямар хор уршиг авчрах нь тодорхой. Хардах онцлог ч гэж бий. Эрэгтэй нь хардахаараа эхнэр рүүгээ халддаг бол, эмэгтэйчүүд голдуу нөхрийнхөө "нууц амраг руу” дайрдаг аж. Эрэгтэй хүн хардуулснаар улам цаашлана уу л гэхээс биш, наашлах нь хэзээ ч үгүй. Хартай аав ээжтэй айлын хүүхэд ч багаасаа хүнд итгэхээ байж, том болсон хойноо мөн л хартай хүн болж хувирдаг.

- Хардалт бол угтаа бөгсний хэрүүл юм шүү дээ. Иймээс тийм хэрүүлийг эс тэвчвэл айл гэрийн өнгө хөсөр дааж, алаг үрс нь өөдлөхгүй.