Танзани улс уул уурхайн салбарт дээд амжилт тогтоох мөнгийг хөрөнгө оруулагчдаас нэхлээ
Үүнд шинэчилсэн татвар хураамжийг нөхөж нэхэх, хүү, торгууль зэрэг багтаж байгаа гэнэ. Танзаний ерөнхийлөгч Жон Магуфулигийн гадаадын хөрөнгө оруулалттай уул уурхайн компаниудтай хийж буй тэмцлийн сүүлийн алхам энэ болж байна. Үүний цаана уул уурхайн бизнесийг төрд авах, зарим тохиолдолд бизнесийг нь зогсоох санаа нуугдаж байгаа юм.
Үүнээс өмнө Танзаний уул уурхайн салбар харьцангуй бага татвар, лицензийн уян хатан нөхцөлтэйд тооцогддог байв. Тус улсын уул уурхайн салбар Дотоодын Нийт Бүтээгдэхүүний 3 орчим хувийг бүрдүүлдэг. Одоогоор зөвхөн алтны олборлолт явагддаг ч цаашдаа алмааз, уран, төмөр, нүүрсний төслүүд эхлэхээр бэлдэж байгаа юм. Танзани улс Африкийн дөрөв дэх том алт олборлогч орон бөгөөд Acacia болон AngloGold Ashanti нийлээд өнгөрсөн онд 37 тонн алт олборлосон байна.
Тэгвэл саяхан тус улсын эрх баригчид шинээр гурван хууль баталсан нь уул уурхайн компаниудаас олох орлогыг нэмэгдүүлэхэд чиглэжээ. Үүнд хувь эзэмшигчдийн харьцаа, өндөр рояалти, татварын өсөлт зэрэг багтаж байна.
Үүнээс гадна уул уурхайн компаниуд Танзаний иргэдийг сургах, дадлагажуулах, дотоодын нийлүүлэгчдийг дэмжих, дотоодоос нийлүүлэх боломжгүй салбарт заавал дотоодын этгээдүүдтэй хамтарсан компани байгуулах зэрэг шаардлагууд тавигдаж байна.
Яг одоо Танзани дахь уул уурхайн хөрөнгө оруулагчид засгийн газрын тулгаж байгаа нөхцөлд ажиллахад ашигтай байх эсэхээ тооцоолж байгаа ажээ.
Хэрвээ компаниуд хуулийн хэрэгжилтэд саад хийхээр оролдвол "Бүх уурхайг хааж, тэднийг Танзаний талд олгоно” хэмээн ерөнхийлөгч Жон Магуфули өнгөрсөн долоо хоногт мэдэгдсэн юм.
Эх сурвалж: Quartz
