Алтны хэмжээг 2-3 тонноор тогтвортой нэмэгдүүлж, 2020 онд 25 тоннд хүргэх боломжтой
Монгол Улсын Засгийн газраас "Алт-2” Үндэсний хөтөлбөр хэрэгжүүлэх тогтоол батлагдаад байгаа билээ.Хөтөлбөрийн хэрэгжилтийг улсын хэмжээнд зохион байгуулах үүрэг бүхий Ажлын хэсгийг Уул уурхай, хүнд үйлдвэрийн сайдаар ахлуулан байгуулсан.
Засгийн газрын 2016-2020 оны үйл ажиллагааны хөтөлбөрийг хэрэгжүүлэх, эдийн засгийг сэргээх зорилгоор "Алт-2” хөтөлбөрийг хоёр үе шаттайгаар 2020 он хүртэл хэрэгжүүлнэ. Хөтөлбөрийн үр дүнд жилд олборлох алтны хэмжээг 2-3 тонноор тогтвортой нэмэгдүүлж, 2020 онд 25 тоннд хүргэх боломжтой юм. Хөтөлбөрийг хэрэгжүүлснээр ашигт малтмалын нөөц ашигласны төлбөр хэлбэрээр жилд дунджаар 33-59 тэрбум төгрөгийг улсын төсөвт оруулж, геологийн эрэл хайгуулын ажлын үр дүнд Монгол Улсын алтны бэлтгэгдсэн нөөцийг 100-150 тонноор нэмэгдүүлэх боломжтой юм.
Манай улс өмнө нь "Алт хөтөлбөр” болон "Алт-2000 хөтөлбөр”-ийг 1992-2000 онд хэрэгжүүлж байсан юм. Үндэсний статистикийн хорооны 2015 оны мэдээгээр манай улсын алтны үйлдвэрлэл ДНБ-ний 2.6 хувь, экспортын орлогын 9.1 хувийг эзэлж байгаа юм.
Алт-2 үндэсний хөтөлбөрийг хэрэгжүүлэх ажлын нарийвчилсан төлөвлөгөө батлагдсан бөгөөд Дэд ажлын хэсгүүдэд төлөвлөгөөний дагуу ажил явагдаж байна.
"Алт-2" үндэсний хөтөлбөрийн хүрээнд Монгол Улсын Хөгжлийн банкаар дамжуулан зээл авах аж ахуйн нэгж, байгууллагуудад тавигдах шаардлага, бүрдүүлэх баримт бичгийн жагсаалт батлагдсан. Дэлгэрэнгүй мэдээллийг АМГТГ-ын цахим хуудаснаас харах боломжтой.
Дотооддоо эцсийн бүтээгдэхүүн үйлдвэрлэхээр ажиллаж байна
Монгол улсын хүнд аж үйлдвэрийн хөгжлийн хөтөлбөрийг боловсруулахаар хүнд аж үйлдвэрийн газрын зургийг боловсруулж байна. Энэхүү Хүнд аж үйлдвэрийн газрын зургийг боловсруулснаар цаашид Монгол улсын хүнд үйлдвэрийн талаарх төсөл, хөтөлбөрүүдийг хаана хэрэгжүүлэх нь тодорхой болох юм.
Монгол улсын Засгийн газрын 2017.03.15-ний хуралдаанаар Өмнөговь аймгийн Ханбогд суманд зэсийн баяжмал боловсруулах үйлдвэр байгуулахаар дэмжсэн байна. Жилдээ 1 сая тонн зэсийн баяжмал боловсруулж 257 мянган тонн цэвэр зэс үйлдвэрлэж, (5.8 тн/жил), (60 тн/жил) үнэт металлыг ялган авч дотооддоо боловсруулах гарц нээгдэнэ.
Газрын тосны боловсруулах үйлдвэрийг барих хөрөнгө оруулалтын асуудлыг Засгийн газрын хуралдаанаар дэмжсэн. Уг үйлдвэр нь 1.5 сая тонн газрын тос боловсруулах бөгөөд хэрэгжих хугацаа 5 жил байхаар төлөвлөгдсөн байна. Уг төсөл хэрэгжсэнээр улсын болон орон нутгийн төсөвт 230 сая ам.доллар, 614 ажлын байр нэмэгдэнэ. Авто бензин 649 мянган тонн, дизель түлш 1169 мянган тонн, онгоцны түлш 49 мянган тонн, шингэрүүлсэн шатдаг хий 86 мянган тонн, нефтийн кокс 84 мянган тонн, хүхэр 1.6 мянган тонн бүтээгдэхүүн үйлдвэрлэх урьдчилсан төлөвлөгөө гараад байна.
"Эрдэнэс Монгол” компани болон АНУ-ийн "Поларис Ассет” корпорац, "Жи Пи Морган”, "Женерал Электрик” компаниас хамтран "Нүүрснээс шингэн түлш үйлдвэрлэх” төслийн үе шат амжилттай хэрэгжиж байна.
АМГТГ нь энэ онд улсын төсөвт 85.5 тэрбум төгрөгийг төвлөрүүлээд байна
Үүнээс газрын тосны экспортын орлогоос 67,5 тэрбум төгрөг төвлөрүүлээд байна.
