Хураалгасан өнгөт чулуугаа авах гэж Хэнтийн Бор-Өндөрийн дарга нарт 3,9 сая төгрөг, машинд нь 100 мянгаар шатахуун хийж өгчээ

Энэ хэрэг хоёр жилийн өмнө гарсан ч мөрдөн байцаалтын шатанд удсаар саяхан шийдвэрлэгджээ. Гэхдээ бас л нэг хурган дарга нарын хэрэг юм. Өдгөө доод түвшний дарга нарын хахуулын хэрэг л илэрч шүүхэд шилждэг болжээ. Хэнтийн Бор-Өндөрийн бизнесмэн эмэгтэй З.Цэнгэлмаа нь худалдаж авсан 108 кг байгалийн өнгөт чулуугаа цагдаад хургаалгажээ. Цагдаа сумын ЗДТГ-д шилжүүлсэн байна. Хураасан чулууг устгах, улсын орлого болгох эсэхийг "Захиргааны журмаар эд зүйлийг хураах, улсын орлого болгох, устгах нийтлэг журам”-дагуу  сумын Засаг даргын дэргэдэх захиргааны зөвлөл шийдэх учиртай. 108 кг өнгөт чулуу нь хэдий хэрийн үнэ хүрэх нь тодорхойгүй ч түүний төлөө 3,9 сая төгрөг бэлнээр бас 100 мянган төгрөгний шатахуун "зарлагдсан” гэхээр овоо үнэтэй эд аж. Нэгэнт сумын удирдлагад шилжин ирсэн тул хэрхэхийг тухайн үед сумын Засаг даргаар ажиллаж байсан Э.Энх-Эрдэнэ, ЗДТГ-ын дарга Б.Шинэцогт нар нар шийдэх байжээ. Гэхдээ бизнесмэн эмэгтэй өндөр үнээр худалдаж авсан найман хайрцаг чулуугаа зүгээр алдахыг хүссэнгүй.

Тэрээр уг нь их зөв хүнээ "барьж авсан” нь Алтантогос гэгчээр дамжуулан Засаг даргын нагац эгч Отгонцэцэг, түүний нөхөр Хасбаатар нартай танилцжээ. Тэгээд "миний цагдаад хураалгасан чулууг устгах гээд сумын ЗДТГ-т шилжүүлсэн байна. Чи засаг даргын хамаатан учраас гуйгаад 2-3 хайрцаг ч хамаагүй аваад өгөөч” гэжээ. Мөн бүтээх юм бол гомдоохгүй, гурван саяыг өгнө гэсэн байна. Ингээд хамаатнууд хүний ажлыг "бүтээж” өгөхөөр Засаг дарга дүүтэйгээ уулзахад устгах эсэхийг одоохондоо шийдээгүй байгаа гэжээ. Гэсэн ч удалгүй залгаж нөгөө хүнээ дагуулаад сумын засаг даргын тамгын газрын дарга Шинэцогт гэдэг хүнтэй уулзаарай, би хэлчихсэн байгаа гэсэн "баяртай” мэдээ дуулгажээ. Энэ зуурт тэрээр ЗДТГ-ын даргаа гурван ч удаа дуудан  сүүлдээ "тэр чулууг нь өгчих л дөө, юун сүртэй юм бэ” гэж уурлажээ. Уурлахад нь айсан тамгын газрын дарга  яаж өгөх тухай "чиглэл” асуусанд "та өөрөө устгах комисс томил, Ховостын хиймэл нууранд устгаж байгаа хэдэн зураг авахуулсан болоод эзэнд нь өгчих” гэсэн энгийн хэлжээ. Мөн өөрийнхөө машинд л ачиж яваарай, өөр хүний унаанд хэрэггүй, бас чулууны эзнээр машиндаа шатахуун хийлгээрэй гэжээ. Ингээд ЗДТГ-ын дарга өөрийгөө оролцуулаад Мөнхцэцэг, Түвшинбаяр, Отгонтунгалаг нарын дөрвөн хүнтэй хураагдсан чулууг устгах комисс томилжээ. Устгалд гарахаас өмнө комиссын гишүүдэд "чулууг эзэнд нь буцааж өгнө, харин устгаж байгаа байдлаар акт үйлдэнэ шүү” гэж үүрэгджээ. Гишүүд болохгүй гэхэд би мэдэж байна хэмээн даргархжээ. Ингээд найман хайрцаг чулууг машиндаа ачаад хөдөлсөн гэнэ. Ховостын нууранд ирэхэд араас чулууны эзэн машинтайгаа иржээ.

Машинд нь Засаг даргын хамаатнууд сууж байж. Мөн энгийн чулуу ачиж ирсэнийг нь нууранд устгаж байгаа байдлаар хэдэн зураг даржээ. Дараа нь тамгын газрын даргын машинд байсан хайрцагтай чулуунуудыг онгойлгож ч үзэлгүйгээр эзнийх нь машинд зөөн ачсанаар хураагдсан чулууг "устгах” ажиллагаа "амжилттай” явагдаж дуусжээ. Чулууний эзэн даргын машиныг 100 мянган төгрөгний шатахуунаар цэнэглэж өгсөн байна. Мөн 3,9 сая төгрөг бэлэн авч явснаа Засаг даргын хамаатнуудад өгсөн нь тэр оройдоо даргын халаасанд орсон гэнэ. Гэтэл удалгүй аймгийн цагдаагаас эдийн засгийн төлөөлөгч ирж Засаг даргыг дуудаад хорино, цагдана хэмээн зандарч чанга дуугаар хашгирсанд айхдаа мөнгө авснаа хүлээн гарын үсэг зурж өгөөд бурууджээ. Уг чулууны төлөө нэг ч төгрөг аваагүй гэнэ. Хамаатнуудыг нь хорино, дараа нь хэргийг нь хэрэгсэхгүй болгоно гэхээр нь итгээд л гарын үсэг зурчихсан аж. Чулуу устгалын хэрэг хэрхэн цагдаагийн чихэнд хүрсэн нь сонин. Сум жижигхэн тул дотроосоо л мэдээлэл өгсөн болж таарчээ.

 

НУУЦ.мн