Сахилгын шийтгэлийг нийтэд мэдээлэх журмыг хугацаанд нь хэрэгжүүлж ажиллахгүй байна
“Жаст групп” компанийн захирал Ш.Батхүү нарт холбогдох хэргийг Хан-Уул дүүргийн Эрүүгийн хэргийн анхан шатны шүүх өнгөрсөн гуравдугаар сард урьдчилсан байдлаар хэлэлцээд прокурорт буцаахаар шийдвэрлэсэн билээ. Уг хэрэгт Ш.Батхүүгээс гадна “Эрдэнэт үйлдвэр”-ийн ерөнхий захирал асан Ч.Ганзориг, Хуулийн хэлтсийн дарга байсан Б.Мөнхжаргал, Хөрөнгө оруулалтын хэлтсийн даргаар ажиллаж асан Г.Амарбат, “Алтжин” группийн захирал Г.Алтан, түүний хүү Эдуард Сүрэн нарыг яллагдагчаар тооцсон юм.
“Эрдэнэт үйлдвэр”-ийн 51 хувийг 2009 онд Өмнөд Африкийн “Стандарт” банканд барьцаалж 109 сая ам.долларын зээл авсан хэрэгт дээрх хүмүүсийг буруутгаж буй. Ингэхдээ “Эрдэнэт үйлдвэр”-ийн ерөнхий захирал Ч.Ганзоригийн өгсөн үүргийн дагуу Г.Амарбат, Б.Мөнхжаргал нар бичиг баримтыг нь бүрдүүлсэн. Ш.Батхүү, “Алтжин” группийн захирал Г.Алтан, түүний хүү Э.Сүрэн нартай бүлэглэн Төрийн банкийг залилсан үндэслэлээр яллагдагчаар татсан юм.
Анхан шатны шүүхээс дээрх хүмүүст холбогдох хэргийг прокурорт буцаахдаа зайлшгүй нэмж тодруулах шаардлагатай хэмээн таван үндэслэл бүхий захирамж гаргасан байдаг. Харин хэрэгт хяналт тавьж байсан НПГ-ын хяналтын прокурорууд шүүгчийн захирамжийг эсэргүүцэж, нийслэлийн Эрүүгийн хэргийн давж заалдах шатны шүүхэд хандсан. Тус шүүхээс таван үндэслэлийн хоёрыг нь хүлээн авч, гурвыг нь анхан шатны шүүхийн шүүгчийн захирамж хуульд нийцсэн гэж дүгнэжээ. Дээр нь нэмээд мөрдөн байцаалтаар зайлшгүй нэмж тодруулах шаардлагатай хэмээн нэг бус зүйл магадлалд оруулсан гэнэ. Бидэнд олдсон мэдээллээр Ш.Батхүү нар Өмнөд Африкийн “Стандарт” банкнаас 109 сая ам.доллар зээлэхдээ байгуулсан гэрээг эх хувиар нь тус банкнаас авч хэрэгт хавсаргах тухай шаардлага нэмж оруулсан гэдгийг эх сурвалжууд өгүүлэв.
