Амиа хорлосон хүмүүсийн 84 хувь нь эрчүүд байдаг

Дэлхийн эрүүл мэндийн байгууллагын гаргасан судалгаагаар 40 секунд тутамд нэг хүн амиа хорлож, жилд 10-20 сая хүн амиа хорлох оролдлого хийдэг байна. Энэ тухай Нийгэм, сэтгэл судлалын дээд сургуулийн “Сэтгэл судлаач мэргэжлийн үнэ цэнэ” олимпиадын үеэр танилцуулав. Түүнчлэн тэр үеэр 2020 он гэхэд 20 секунд тутамд нэг хүн амиа хорлож , амиа хорлох оролдлого 10-20 дахин өсөх буюу 1.5 сая орчим хүн амиа хорлох төлөвтэй байгаагэсэн судалгаа гарсан аж. Мөн манай улс амиа хорлолтоороо дэлхийд гуравдугаарт бичигддэг ба Шри ланка, Гайна зэрэг улс эхний хоёр байрт ордог байна.

Өнгөрсөн онд гаргасан судалгаагаар манай улсын зуун мянган хүн тутамд 28.1 хүн амиа хорлодог гэжээ. Амиа хорлосон хүмүүсийн 84 хувь нь эрчүүд, 47 хувь нь ажилгүйчүүд гэнэ. Уг арга хэмжээний үеэр амиа хорлолтын шалтгааныг илтгэгч тайлбарлахдаа “Амиа хорлосон хүмүүс ар гэрийнхэндээ болон найз нөхөд танил хүмүүсдээ маш том хар толбо үлдээдэг . Цаашлаад удам судар, үр удамдаа ч гай тарьдаг. Учир нь амиа хорлосон хүний удамд дахин амиа хорлох үйлдэл давтагдах гээд байдаг талтай. Генээр дамжиж үр хүүхэд нь ч энэ рефлексээр амиа хорлох үйлдэл гардаг байна. Хүний амьдрал жаргал, зовлонгоор дүүрэн. Зарим хүмүүс өөрт тохиолдож буй хүнд хэцүү давааг давж чадалгүй замаасаа шантарч амиа хорлох арга замыг сонгох нь элбэг байдаг. Ихэвчлэн сэтгэл гутрал, айдас, бухимдал, уур унтууцал, дарамт шахалт, өөрийгөө хэт их буруутгах мөн өөртөө итгэлгүй байдлаас болж амиа хорлолт үүсдэг гэдгийг мэргэжилтнүүд хэлдэг. Хувь хүн бүрийн төвшинд амиа хорлох шалтгааныг судалж үзэхэд осол гэмтлээс болж, сэтгэлийн маш хүнд цохилтод орсноос, сэтгэцийн өвчин буюу аз жаргалгүй байдлаас болоод амиа хорлодог гэсэн дүгнэлт гарсан байна” гэв.

Eagle.mn