Ерөнхий аудитор Д.Хүрэлбаатарын АСЕМ-ын авлига, Оюутолгойн луйврыг шалгана гэдэг ч МЯНГУУЖИНГИЙН ҮЛГЭР байж

2017 оны нэгдүгээр сарын 12-нд Д.Зангад даргын орийг залгаж гарч ирсэн Ерөнхий аудитор бол Д.Хүрэлбаатар юм. Олны хэл ам, хардлага сэрдлэгийн бай болсон Оюутолгой төсөлд аудитын шалгалт оруулна, би чадна, шалга, Таван толгой төсөлд анхаарал хандуулна, Төрийн бүх байгууллагуудад хөндлөнгийн шалгалт оруулж, ямар но, буруу ташаа зүйл, авлига, төсөв мөнгөний хэтрүүлэлт байгааг олж тогтооно хэмээн УИХ-ын чуулганы индрээс гишүүдийн асуултад хариулахдаа ам бардам суусан энэ эрхэм яагаад ойрын үед таг чиг болчхов.

С.Баярын Засгийн газрын үед Эрдэс баялаг, эрчим хүчний яамны төрийн нарийн бичгийн даргын албыг хашиж алдарт "Оюутолгой” төслийн ХОГ-ын гэрээ буюу хөрөнгө оруулалтын гэрээг байгуулсан Д.Зоригт сайдын шадар хүнээр ажиллаж байсан аж.

Н.Алтанхуягийн Засгийн газрын үед "Монгол 555” ХХК-ийн ТУЗ-ийн даргаар ажиллаж байгаад Мэргэжлийн Засгийн газрын Барилга, хот байгуулалтын сайд Г.Мөнхбаярын зөвлөхөөр ажиллаж байгаад энэ албан тушаалд дэвшсэн юм.

Тэрээр Ерөнхий аудитор Д.Зангадыг өөрөөр нь ажлаа өгөх өргөдөл бичихэд хүртэл нь дарамт шахалт үзүүлж байж суудлыг нь залгасан хэмээн түүний ойр хавийнхан ярих нь бий. Ямартай ч эрх мэдэлд хүрчихлээ.  

Гэвч түүний амласан нөгөө мөнгө төгрөг, төсөв санхүүтэй холбоотой ҮЛГЭР төгсчихсөн бололтой. Хөгжлийн банкнаас олгосон "Чингис”, Самурай бондын эргэн төлөлт, "Монголбанк”-инд хийсэн дотоод аудит, АСЕМ-ын уулзалтын төсөвт мөн санхүүгийн шалгалт оруулна хэмээн нэлээд эрчимтэй ярьж, О.Баасанхүү, Ц.Нямдорж, Ж.Батзандан нарыг баярлуулаад орхисон мөнөөх Ерөнхий аудитор маань ажлаа хийсэнгүй.

Хамгийн энгийн жишээ дурдахад төрийн төсвийн мөнгийг зориулалтын бусаар зарцуулж нэгэн лаборатори сургуулийн захирал ажлын зуу хоногийн тайлан хэвлүүлж байна. Ядаж л Боловсролын яам БНХАУ-ын буцалтгүй тусламжаар баригдах сургууль цэцэрлэгийн тендертэй холбоотойгоор тус яамны удирдлагууд ажлаас халагдсан нэгнийхээ нэрийг барьж тендер будлиулж мөнгө авсан байж болохуйц хэд хэдэн зөрчил илрээд байхад гараа хүлүүлж, амаа үдүүлсэн юм шиг таг сууж байгаа нь хачирхалтай юм.

Оюутолгойн гэрээнд санхүүгийн тайлан, шалгалт хийнэ гэж ярьсан нь энэ янзаар бол бүүр худлаа болж таарлаа. Учир нь Сүр дуулиантай гэрээг байгуулахад голлох чиг үүрэгтэй ажилласан толгой яамны аппратад энэ эрхэм ажиллаж байсан юм. Өөрөө өөрийнхөө бурууг шалгана, но-г илрүүлнэ ч гэж юу байхав.

Би чадна, хийнэ гэж амласан шигээ одоо хийж, шалгаж, АСЕМ-ын хөрөнгө оруулалт, санхүүгийн тайланд аудитын шалгалт оруулах болон бусад томоохон асуудалд олигтойхон хандаж, хүчтэй дуугарч, зоригтойгоор шалгахыг танаас ард түмэн чинь, намын чинь нөхөд хүсч байна Д.Хүрэлбаатар дарга аа!!!

Эх сурвалж: www.ULSTURCH.mn