С.Одонтуяа: Эрх баригчид ЖДҮ-гээ замхруулсан шиг нүүрсний хулгайн хэргийг замхруулж байна

УИХ дахь АН-ын бүлгээс нүүрсний хулгайтай холбоотой асуудлаар байр сууриа илэрхийллээ. 

УИХ-ын гишүүн С.Одонтуяа "Өчигдөр ордонд 20:00 цаг хүртэл гарч чадахгүй удсан. Нүүрсний хулгайтай холбоотой асуудлыг нээлттэй явуулах талаарх гишүүдийн гарын үсэг бүхий албан бичгийг УИХ-ын даргад зарим гишүүн өргөн барилаа. Үүний дагуу УИХ-ын дарга дээрх асуудлаар нээлттэй сонсгол зохион байгуулах үүргийг холбогдох газруудад өгсөн. Ингээд УИХ-ын гишүүн Г.Ганболдоор ахлуулаад ажлын хэсэг байгуулсан. Миний бие орсон байгаа. Бид эцэс хүртэл нь явна. 

ЖДҮ-гийн асуудлыг эцэслэж мухарлаагүй явдлаас болоод ЖДҮ авсан гишүүд амтшаад сонгуулийнхаа мөнгийг хийгээд УИХ-д сууж байгаатай холбоотой. Нүүрсний асуудалд УИХ, Засгийн газрын олон гишүүн холбогдсон байгаа. Энэ хүмүүс яаж сандарч байгааг та нар харж байна. Нүүрсний хулгайг нь ил болгохоор Засгийн газар нь ганхах гээд сандарч байна.

МАН-ынхан нүүрсний хулгайг илрүүлсэн л гэж байна. Яагаад илрүүлсэн хүмүүс нь энэ хулгайгаа дарж болоогүй юм. Ард түмэнд талхаа таллаж авч байгаа үед иргэд ингэж жагсах нь аргагүй. 

Яагаад энэ их тансаглалын мөнгөөр олон иргэнийг ядуурлаас гаргах бичил бизнесийг дэмжиж болоогүй юм. Эрх баригчид ЖДҮ-гээ замхруулсан шиг нүүрсний хэргийг замхруулж, УИХ-ын сонгуулийг наашлуулна гэж иргэдийг янз бүрийн аргаар хуурах гэж оролдож байна. Ингэж замхруулна гэсэн зүйл байхгүй. УИХ-д шударга гишүүд байгаа. Энэ асуудлыг дуустал нь явна" гэлээ.