Венесуэль шатахуун түгээх станцуудаа хаана

Венесуэлийн Засгийн газар коронавирусийн халдварын тархалтыг зогсоохоор хөл хорио тогтоохын  зэрэгцээ улс даяар шатахуун түгээх станцуудаа хаах тухай хэлэлцэж эхэлжээ. 1800 шатахуун түгээх станцтай “Petroleos de Venezuela SA” компани цөөн хэдэн салбараа нээлттэй үлдээж, армийнхны хяналт дор ажиллуулах юм байна. Нээлттэй шатахуун түгээх станцуудыг зөвхөн эрүүл мэнд, хоол хүнс болон зайлшгүй шаардлагатай өргөн хэрэглээний бараа бүтээгдэхүүний тээвэрт зориулж ажиллуулахаар төлөвлөж буйг эх сурвалжууд онцолж байна. Венесуэльд коронавирусийн халдварын тохиолдол сүүлийн хоёр долоо хоногийн дотор 70 болж нэмэгдээд байгаа юм.

Халдвар хурдацтайгаар тархаж эхэлбэл  тогтоон барьж дийлэхгүй гэж эмч нар  нь болгоомжилж байна. Учир нь, Венесуэлийн эрүүлийг хамгаалах салбарт  явуулсан үндэсний хэмжээний судалгаанаас харахад  CAT, MRI машинуудын 95-аас илүү хувь нь ажиллахгүй байгаа бол лабораторийн 43 хувь нь үйл ажиллагаагаа зогсоож, эмнэлгийн орны 33 хувь нь эвдэрчээ. Мөн нийт эмнэлгийн 51 хувь нь ажиллахгүй байгаа гэнэ. Каракас хотын дарга асан Антонио Ледезма “Венесуэльд хүмүүнлэгийн хямрал болж байна. Арван жилийн өмнө үндсээр нь устгасан өвчин дахин сэргэж, олон зуун хүн улаан бурхан, сахуугаар амиа алдаж байна. Өнгөрсөн жил  гэхэд 400 мянга гаруй хүн хумхаагаар өвчилсөн. Өнөөдөр сүрьеэтэй 10 мянга гаруй хүн байна” хэмээжээ. Мөн хорт хавдраар өвчилсөн 55 мянга гаруй хүн химийн эмчилгээ хийлгэж чадахгүйд хүрсэн бөгөөд гурван цаг тутамд нэг эмэгтэй хөхний хорт хавдрын улмаас амиа алдаж байгаа аж. Хүүхдийн болон архаг, суурь өвчинд  хэрэглэгддэг антибиотикууд ч дуусчээ. Түүнчлэн эмнэлгийн ажилтнуудын 55 гаруй хувь нь буюу эмч, сувилагчид улс орноо орхиод байгаа юм. Үүнээс гадна сүүлийн үед тус улсад шатахууны хомсдол үүсэж, хэрэглэгчид олон цаг дараалалд зогсож, шатахууны саваа дүүргэдэг болоод байна. Тус улс газрын тосны олборлолтоор дэлхийд тэргүүлэгч орон. Өдөрт 760 мянган баррель тос олборлох хүчин чадалтай. Гэвч газрын тос боловсруулах хүчин чадал нь 15 хувь буураад байгаа. Энэ нь олон жилийн буруу менежмент, хөрөнгө оруулалтын дутмаг байдал, авлигын асуудалтай холбоотойгоос гадна АНУ хориг тавиад буй нь нөлөөлсөн гэж үздэг.

Ц.Даваасамбуу, NPOST.MN

Хуваалцах:

Сэтгэгдэл

reload, if the code cannot be seen