"АТГ хэрэг булшилдаг газар болсон тул Нефтийн үйлдвэрийн төмөр замын дэд бүтцийг хийж байгаа компанийн баримтуудыг Ерөнхий сайдад өгнө"

Монголын төмөр замын инженерүүдийн нэгдсэн холбооны Удирдах зөвлөлийн гишүүн Ж.Мөнхбат, Б.Аюуш нар тус холбоог төлөөлж "Улаанбаатар төмөр зам" хувь нийлүүлсэн нийгэмлэгийн удирдлагууд авлигын гэмт хэрэг үйлдсэн талаар мэдээлэл хийлээ.

Манай холбоо “МАНАН дэглэмийн эсрэг монгол түмний нэгдэл” холбоонд нэгдсэн. Учир нь УБТЗ-ын дарга Д.Жигжиднямаагийн хууль бус худалдан авах ажиллагаа хийж, мөнгө угаасан хэргийн талаарх бүх баримт нь ил хэргийг АТГ хоёр жил дарлаа. 

Энэ хүн УБТЗ-ын даргаар томилогдсоноосоо хойш хууль бус олон үйлдэл хийсний нэг жишээг нь дэлгэж байна. Энэ хэргийг бид АТГ-т хоёр жилийн өмнө өгсөн боловч шийдээгүй. Нийслэлийн прокурорт өгсөн, Улсын ерөнхий прокурорт өгсөн. Баримтууд нь бэлэн энэ хэгийг “Шалгаж байна” гээд шийдэхгүй байгаа нь МАНАН дэглэм үйлчилж буйн илрэл.

МТЗ-ын инженерүүдийн нэгдсэн холбооны дэлгэсэн баримт:

Тэрбээр, 2009 оноос УБТЗ-ын хашаанд зогссон зам засварын хоёр машинтай яг ижил үйлдэлтэй ВПРС загварын зам засварын машиныг ОХУ-аас авахдаа Тендерийн хууль зөрчиж, барааг авахаасаа өмнө төлбөрийн 85%-ийг худалдагч компанийн дансанд шилжүүлсэн, Доминикан арлын оффшор бүсэд бүртгэлтэй уг компанийнх нь үүсгэн байгуулагч 2,300 компанийг байгуулсан нь дампуурсан, данс нь дампуурлаа зарлах гэж байсан банканд харьяалагдаж байсан, зах зээлийн ханшаас 700 гаруй мянган ам.долларын үнэтэй авсан баримтуудыг тоочлоо. 

МТЗ-ын инженерүүдийн нэгдсэн холбооны УЗ-ийн гишүүн Б.Аюуш:

Энэ бол УБТЗ дээр болж байгаа маш олон хэргийн ганцхан жишээ. 1,000 вагоны хэргийг та бүхэн мэднэ. Өмнө нь яг үүн шиг актлагдсан нэг ширхэг сэлгээний зүтгүүр авсан төмөр замын удирдлага дээр АТГ хэрэг үүсгэж, гурван шатны шүүхээр ял авч байсан. Гэтэл яг ийм хэргийг 1,000 удаа давтсан хүнийг шалгахгүй байна. н.Эрдэнэхүү гэж АТГ-ын дарга Х.Энхжаргалын дүү нь Актлагдсан 1,000 вагоныг засах газрын дарга болчихсон. 

Арван жилийн өмнө УБТЗ 16 суудлын вагоныг 17 тэрбумаар авсан. Гэтэл өнгөрсөн жил энэ вагонуудыг 16 тэрбум төгрөгөөр засуулж байна. Худалдан авахтай ижил хэмжээний мөнгөөр засна гэж байх уу. Энэ мэт 11 хэргийг АТГ-д өгсөн ч нэг ч шийдэгдээгүй. 

“Нефть боловсууралх үйлдвэрийн төслөөс мөнгө идэх гэж байгаад гогдуулав аа” гэж Ерөнхий сайд У.Хүрэлсүх хэлсэн. Тэгвэл Нефть боловсруулах үйлдвэрийн 27 км төмөр замын суурь бүтцийг хийж байгаа компанитай холбоотой баримтууд бий. АТГ хэрэг булшилдаг газар болсон тул баримтуудыг Ерөнхий сайдад өгнө.

IKON.MN