Ш.Ёл: Ноолуурыг стандартын дагуу бэлтгэж, чанарыг сайжруулснаар зах зээл дэх үнийг өсгөж, малчдын орлого нэмэгдэх боломжтой
Дорнод аймагт Монгол Улсын Засгийн газар, Хүнс, хөдөө аж ахуй, хөнгөн үйлдвэрийн яам, ХАА-н бирж, “АДАПТ” төсөл, Монголын ноос ноолуурын холбоо байгууллагуудаас “Ямааны ноолуурын чанар стандартын шаардлагын дагуу түүхий эд бэлтгэх” сэдэвт сургалтыг Дорнод аймгийн хоршоологчдод явуулж байна.
Сургалтаар ноолуур бэлтгэх ямаа самнах технологи ажиллагаа, ямааны тавлаг байдал, ноолуур бэлтгэлийн чанарын шаардлага, ноолуурыг чанараар ангилан ялгаж бэлтгэх арга аргачлалын мэдлэг, ур чадварыг эзэмшүүлэх зорилгоор зохион байгуулж байгаа юм.
Монгол Улс Дэлхийн ноолуурын 40-50 хувь буюу жилд дунджаар 9.0 мянган тонн ямааны ноолуур бэлтгэдэг бол Зүүн бүс нутаг улсын хэмжээнд бэлтгэдэг ноолуурын 13-15 хувийг бэлтгэдэг.
Дорнод аймгийн засаг дарга Ш.Ёл сургалтыг нээж хэлсэн үгэндээ “Малчдын амьжиргааны эх үүсвэрийн нэг болох ноолуурын зах зээл дэх үнэлэмжийг өсгөхийн тулд бид ноолуурынхаа чанарт анхаарах ёстой. Үүний тулд олон улсын стандартын дагуу бэлтгэх нь чухал. Өнөөдрийн сургалт малчид, хоршоологчид маань маш чухал сургалт болж байна.
Цаашид энэхүү сургалтыг сумдад, малчдын түвшинд хүргэж нутагшуулан хэрэгжүүлэх болно” гэдгийг онцоллоо. Мөн Дорнод аймаг малын эрүүл бүсийг байгуулж, чанарлаг түүхий эдийг бэлтгэн эдийн засгийн эргэлтийг нэмэгдүүлэхээр зорьж ажиллаж буйгаа илэрхийлэв.
