Д.Сумъяабазар: Ирэх жилээс ногдол ашиг тараах эсэхийг шийднэ
Эрдэнэс тавантолгой компани өнгөрсөн онд 800 орчим тэрбум төгрөгийн ашигтай ажилласан байна. Харин он гарснаас хойш эхний гурван сарын байдлаар 304 тэрбум төгрөгийн ашигтай ажилласан талаар компанийн удирдлагууд мэдэгдсэн. тэгвэл засгийн газрын мөрийн хөтөлбөрт тус компанийн хувьцааг эдийн засгийн эргэлтэд оруулж, олон улсын зах зээлээс хөрөнгө босгох ажил багтсан. Улмаар УИХ аас тавантолгой төслийг хөдөлгөх 73 р тогтоолыг батлан гаргаад жил орчмын нүүрийг үзэх гэж байна. Өнөөдөр тогтоолын биелэлтийн тайланг эдийн засгийн байнгын хорооны хуралдаанаар сонссон юм.
Монгол улсын 2,5 сая иргэн хувьцаа эзэмшиж байгаа Эрдэнэс тавантолгой компанийн 30 хувийг олон улсын хөрөнгийн биржээр арилжаалахад хүндрэл дагуулах асуудал байгааг салбарын сайд хэллээ. Учир нь дэлхийд 2,5 сая иргэн хувьцаа эзэмшдэг орд газар Монгол улсаас
өөр байхгүйг онцоллоо. Тухайлбал Хонконгийн хөрөнгийн биржээр хувьцаа арилжих ажлыг эхлүүлэхэд 2,5 сая иргэний мэдээллийг нэг бүрчлэн шивэх зэргээс эхлээд хүндрэл байгаа гэнэ. гэхдээ IPO босгох ажлыг эрчимтэй хийж байгааг хэлж байна . Олон улсад хөрөнгө босгох ажлын хүрээнд нэгдсэн бааз үүсгэж бичиг баримт боловсруулалт, гүйцэтгэлийн бусад ажлууд өндөр хувьтай хийгдэж байгааг хэлж байна. Харин иргэдэд олгох ногдол ашгийг энэ жил бүтээн байгуулалтад зарцуулахаар болсныг зарим гишүүд шүүмжилж байлаа. Тэгвэл Ирэх жилээс ногдол ашиг тараах эсэхийг
хувьцаа эзэмшигчдийн хурлаар шийдэх учиртай юм.
