Монголын геологич эмэгтэйчүүд “Геопарк” төсөл хэрэгжүүлэхээр ажиллаж байна

319 Уншсан

2017/06/08

Энэ сарын 4-ний өдөр Монголын геологич эмэгтэйчүүдийн холбооноос Монголд анх удаа "Гео тур-2017” арга хэмжээ зохион байгууллаа. Тус арга хэмжээнд АМГТГ, Монголын геофизикчдийн холбоо, Өрөмдлөгийн холбоо, Ахмадын холбоо тэргүүтэй Монголын геологи, уул уурхайн салбарын 100 гаруй төлөөлөл оролцов. Энэ үеэр Монголын геологич эмэгтэйчүүдийн холбоо (МГЭХ)-ноос "Геопарк” төсөл хэрэгжүүлэхээр төлөвлөн ажиллаж буй талаараа танилцууллаа.

Геопарк нь геологийн чухал ач холбогдолтой нэг буюу хэд хэдэн газруудыг багтаасан талбайд геологийн өвийг хадгалж хамгаалах, энэ тухай олон нийтийн ойлголтыг хөгжүүлэх, хүүхэд залуучуудыг хүмүүжүүлэх, аялал жуулчлал явуулах зорилготой байгуулагддаг байна.

Геологич эмэгтэйчүүд Монгол Улсдаа анхны Геопарк байгуулж, дэлхийн Геопаркийн сүлжээнд оруулахаар төлөвлөж буй ажээ. Монголд хэд хэдэн геопарк байгуулах бүрэн боломжтойг МГЭХ-ны гишүүд өгүүлж байлаа. Тухайлбал, Их газрын чулуу, Цагаан суварга, Хэрмэн цав, Шилийн богд, Ээж хайрхан, Алтай таван богд-Цагаан гол зэргийг нэрлэсэн юм.

МГЭХ-ныхон Улаанбаатар хотоос 70 гаруй км-т орших, Буурал хангай уулын өвөр, Баруун урт талбайд эхний төслөө хэрэгжүүлэхээр төлөвлөн ажиллаж буй юм байна. "Баруун урт геопарк төслийн хүрээнд Баруун урт талбайд 1:1000000 геологи, ашигт малтмалын зураг гаргах, чулуулгийн төрөл бүрээс дээж авч, петрографи, геохимийн судалгаа хийх, тектоникийн нөхцлийг тодорхойлох юм байна. Мөн танин мэдэхүйн зорилгоор модельчилсон загваруудыг гаргаж, талбайд байршуулах ажээ.

Энэ хүрээнд талбайн геологийн план зураг, геологийн бүх хурдсыг харуулсан хөндлөн зүсэлт, шороон ордны алт агуулагч хурдсыг харуулсан зүсэлтийн модель зураг, Жанчивлангийн олон фазат боржингийн массивыг моделиор харуулах, палеонтологийн судалгаагаар амьтан, ургамлын үлдэгдэл бүхий цэгүүдийг тогтоож, моделиор үзүүлэхээр төлөвлөсөн байна.

Эдгээр ажлын үр дүнд Баруун урт талбайд геологийн тогтоцыг нарийвчлан судалж, Монголын анхны геопарк байгуулах үндэслэлийг гаргах ажээ. Мөн тухайн талбайд талбайн талаархи геологи, ашигт малтмал, ховор металлт боржингуудын талаархи мэдээлэл, самбаруудыг байршуулахаар ажиллаж буй юм байна.

Э.ЭНХ-ЭРДЭНЭ geo