Л.Оюун-Эрдэнэ: Шүүгчийн аавынх нь компани руу 70 сая ам.долларын гүйлгээ хийгдсэн
“Эрдэнэт” үйлдвэрийн хувьчлалтай холбоотой Засгийн газрын 2016 оны 32 дугаар тэмдэглэлийг нууцын зэрэглэлээс гаргах шийдвэрийг Засгийн газраас гаргасан. Тэгвэл нууцаас гаргасан материалууд дахь нууцын талаар ЗГХЭГ-ын дарга Л.Оюун-Эрдэнэ, УИХ-ын гишүүн Ж.Батзандан, Л.Болд нар дэлгэлээ.
УИХ-ын гишүүн, ЗГХЭГ-ын дарга Л.Оюун-Эрдэнэ:
“Эрдэнэт үйлдвэр” компанийн 49 хувийг авах боломж тухайн үеийн Засгийн газарт байсаар байхад үүнээсээ татгалзаж, хувийн аж ахуйн нэгжид давуу байдал олгосон. 49 хувийг худалдан авсан 400 гаруй сая ам.долларын 72.4 хувийг төрөөс, үлдсэн 27.6 хувийг Худалдаа хөгжлийн банк гаргасан байх магадлалтай. Үүнд, Монголбанкнаас өрийн бичиг бичиж хоёр удаа 200 тэрбум төгрөг авсан, Хөгжлийн банкнаас 71.3, 51.3 сая ам.долларыг зээлсэн, Аж үйлдвэрийн яамнаас 90.3 сая ам долларын зээл, Худалдаа хөгжлийн банкнаас 111.2 сая ам.долларын барьцаагүй зээл, Монголбанкнаас зузаатгал хийж 160 тэрбум төгрөг авсан” гэлээ.
Түүнчлэн “Санхүүгийн эх үүсвэр байсаар байтал тухайн үеийн эдийн засгийн нөхцөл байдалтай холбогдуулж, Монгол Улсын Засгийн газар худалдан авах боломжгүй гэдэг дүгнэлт гаргаж Засгийн газар худалдан авах давуу эрхээсээ сайн дурын үндсэн дээр татгалзсан. Ингээд”Монголиан Коппер” буюу Худалдаа хөгжлийн банкны ард байгаа компанид давуу эрхийг олгосон. Энд хууль хяналтын байгууллага гүнзгий оролцсон. Үүний дараа “Эрдэнэтийн 49 хувийн талд гурван удаагийн шүүхийн шийдвэр гаргасан шүүгчийн аавынх нь компани руу 70 сая ам.долларын гүйлгээ хийгдсэн. Тиймээс шүүгчийг АТГ, Шүүхийн ерөнхий зөвлөлд хандахаар болсон” хэмээлээ.
Тэрбээр тус компанийн 49 хувийн хувьцааг “Монголиан коппер корпорэйшн” компани худалдан авсан 400 сая 270 мянган ам.доллараа хэрхэн бүрдүүлсэн талаарх схемийг танилцуулсан...
\
УИХ-ын гишүүн Ж.Батзандан:
Надад тухайн үеийн Засгийн газрын хуралдааны протокол байна. Энд улсын мөнгөөр улсын үйлдвэрийг хэрхэн худалдан авах загварыг энэ хүмүүс гаргасан. МАНАН төрийн өмчит компаниудыг төдийгүй хууль хяналтын байгууллагыг хувьчлаад авчихсан. Ц.Элбэгдорж, Б.Хурц хоёр хууль хяналтын байгууллагыг эрхэндээ байлгасаар байгаа. “Эрдэнэт”-ийн 49 хувь эргэж ирнэ.
Нууцын зэрэглэлээс гаргасан Засгийн газрын хаалттай хуралдааны тэмдэглэлээс
ЭХ СУРВАЛЖ: ORD.MN
