Өр, зээлийн асуудлаас болж, нэгнийгээ хутгалсан гэх этгээдүүд мансуурдаг байж болзошгүй

Гудамжинд зорчиж явсан иргэд рүү хутга барин халдаж, автомашинаар дайрахыг завдсан этгээдүүдийг олж тогтоон шалгаж эхэлсэн талаар бид өмнө нь мэдээлсэн билээ. Тэгвэл эл хэргийн талаар цагдаагийн байгууллагаас дараах мэдээллийг өглөө.  

Цагдаагийн байгууллагад 2023 оны 09 дүгээр сарын 18-ны өдрийн 11 цаг 15 минутад Баянгол дүүргийн 11 дүгээр хороо, “Гурван гал эмнэлэгт хутгалуулсан хүн орж ирлээ” гэх дуудлага, мэдээлэл бүртгэгдсэн. Тус дүүргийн цагдаагийн газрын нэгдүгээр хэлтсээс шалгахад 28 настай, эрэгтэй “С” болон 34 настай, эрэгтэй “А” нарын биед 31 настай, эрэгтэй “О” гэгч нь тус бүр 2-3 удаа мэсээр халдаж зугтсан байна.

Цагдаагийн алба хаагчид “О” гэгчийг Сонгинохайрхан дүүргийн нутаг дэвсгэрээс олж тогтоон баривчилсан бөгөөд уг этгээд нь 4 удаагийн гэмт хэрэгт шүүхээс ял шийтгэгдэж байсан байна. Урьдчилсан байдлаар дээрх этгээдүүд нь биесээ таньдаг бөгөөд өр, зээлийн асуудлаас болсон гэж мэдүүлж байгаа хэдий ч, мансууруулах эм, сэтгэцэд нөлөөт бодис хэрэглэдэг байж болзошгүй нөхцөл байдал тогтоогдоод байна.