Кувейт улс газрын тосны олборлолтоо бууруулна
Ойрх Дорнодод зэвсэгт мөргөлдөөн үргэлжилсээр буй энэ үед Кувейтийн “Kuwait Petroleum Corporation” компани давагдашгүй хүчин зүйл үүссэнийг зарлаад, газрын тосны олборлолтоо бууруулна гэж мэдэгдлээ.
АНУ, Ираны зэвсэгт мөргөлдөөн ес дэх хоногтоо үргэлжилж байгаа нь Персийн булангийн бүс нутгаас нефть, хий зөөвөрлөхөд ноцтой саад учруулж байна. Дэлхий даяар экспортолж буй нефть ба шингэрүүлсэн шатдаг хийн 20 орчим хувь нь дамжин өнгөрдөг Ормузын хоолой хаагдсанаар нөхцөл байдал үлэмж хүндэрчээ.
Кувейтийн компани түүхий нефтийн олборлолт ба боловсруулах хэмжээг бууруулна гэдгээ мэдэгдсэн боловч яг ямар хэмжээгээр бууруулах нь тодорхойгүй байна. Ташрамд дурдахад, Кувейт улс хоёрдугаар сард хоногт 2,6 сая баррель нефть олборлож байжээ. Олборлолтоо бууруулах шийдвэр нь урьдчилан сэргийлэх шинжтэй бөгөөд нөхцөл байдлаас хамааран шийдвэрээ эргэн харна гэж Kuwait Petroleum Corporation мэдэгдсэн байна. Мэдэгдэлд дурдсанаар, Ираны зүгээс Ормузын хоолойгоор өнгөрөх хөлөг онгоцууд руу гал нээнэ гэж заналхийлсэн, Кувейтэд цохилт өгсөөр байгаа болон нефть ба нефть бүтээгдэхүүнийг тээвэрлэх хөлөг онгоцууд Персийн буланд олдохгүй байгаа зэргээс шалтгаалан Кувейтийн компани форс-мажор зарлажээ.
Kuwait Petroleum Corporation бол Ази руу нафта экспортолдог, баруун хойд Европ руу онгоцны түлш нийлүүлдэг хамгийн том компани юм. Нафта гэдэг нь нефть-химийн бүтээгдэхүүн үйлдвэрлэхэд ашигладаг түүхий эд юм.
Одоогийн байдлаар Катарын Qatar Energy компани хийн нийлүүлэлтэд форс-мажор үүссэнийг зарлаад байна. Катар бол шингэрүүлсэн хийн экспортоор дэлхийд гуравдугаарт ордог улс юм. Мөн Саудын Арабын Saudi Aramco компани хамгийн том нефть боловсруулах үйлдвэрээ зогсоожээ.
Б.Адъяахүү
