"Хууль хүчний байгууллагынхан хуйвалдаж "Ayud tower"-ыг БНХАУ-ын иргэнээс дээрэмдсэн нь тогтоогдсон"
Засгийн газрын хуралдааны дараа Хууль зүй, дотоод хэргийн сайд Б.Энхбаяр гадаадын иргэний хөрөнгийг хууль бусаар өмчлөлдөө шилжүүлсэн асуудлын талаар мэдээлэл өглөө.
Тэрээр "Монголын хуулийн байгууллагын олон албан хаагч үгсэн хуйвалдаж, БНХАУ-ын иргэний хөрөнгийг нь дээрэмдсэн гэх асуудал хяналт шалгалтаар тогтоогдсон. Миний бие тайлбар хийхээс өөр аргагүй нөхцөл байдалд орсон.
Хотын төвийн А зэрэглэлд, Сүхбаатарын талбайн урд байрлах 14000 метр квадрат "Ayud tower" гэх оффисын барилгыг БНХАУ-ын 100 хувь хөрөнгө оруулалттай барьжээ. Гэвч энэхүү оффисын барилгыг зарим албан тушаалтан өөрсдийн өмчлөлд хууль бусаар шилжүүлж авсан гэх гомдол ирсэн. Гомдлын хүрээнд Засгийн газраас хоёр удаа тогтоол гаргаж, нэр бүхий компанийн асуудлыг Хууль зүй, дотоод хэргийн сайд хариуцаж шийдвэрлэх үүрэг чиглэлийг өгсөн байдаг.
Хууль зүй, дотоод хэргийн сайдын хувьд ажлын хэсэг гаргаж тухайн асуудлыг шалгаж авч үзсэн. Улмаар энэ асуудлаар шалгалтын ажлын хэсэг илтгэх хуудас дүгнэлтээ гаргаж, надад танилцууллаа. Хяналт шалгалтын дүнгээр олон ноцтой асуудал тогтоогдлоо. Тухайн өмчийн эзэн Хятад улсын иргэний гарын үсгийг нь хуурамчаар зурсныг нотариат баталгаажуулж, өмчлөлийг шилжүүлсэн нь тогтоогдсон. Нотариатч дээрх үйлдлийг хийснийхээ дараа АНУ руу зугтаж, алга болсон нөхцөл байдал мөн тогтоогдсон. Хуурамч гарын үсгийг нотариатч гэрчилсэн үйлдэл гарч, тэр хөрөнгийг шилжүүлэхдээ Улсын бүртгэлийн байгууллага холбогдох хуульд заасан 11 шаардлага хангах асуудлын найм нь хангагдаагүй байхад бүртгэл хийж, бусдын хөрөнгийг шилжүүлсэн. Энэ бүх асуудлаар Улсын бүртгэлийн байгууллагад олон удаагийн гомдол гаргахад тэдгээр гомдлыг тухай бүрд нь хангалттай хянаж, шалгалгүйгээр эрх зүйн бүрэн бус дүгнэлт хийж, татгалзсан хариуг өгч байсан. Энэ хэрэгт олон этгээд оролцсон байна.
Тухайн компани АТГ, цагдаагийн байгууллагад гомдол гаргаж, нийт найман удаагийн эрүүгийн хэрэг үүсгэгдэж, дөрвөн удаагийн эрүүгийн хэрэгт хэрэг үүсгэхээс татгалзаж, хааж шийдвэрлэсэн нөхцөл байдал мөн тогтоогдсон. Манай маш олон хуулийн байгууллага, албан тушаалтнуудын оролцоотой цаанаа эрх бүхий хүний нөлөөтэйгөөр зохион байгуулалттай хийгдсэн ажиллагаа гэж үзэж байна. Иймээс албан даалгавар гаргаж, Улсын бүртгэлийн байгууллага, Хил хамгаалах байгууллага, нотариатын байгууллагын албан хаагчдад хариуцлага тооцсон.
Үүнтэй холбоотойгоор намайг Сахилга хариуцлага дэг журмыг чангатгах тухай журам гаргаж, тэр хүмүүст хариуцлага тооцлоо, Хятадын талд үйлчиллээ гэдэг байдлаар гүтгэлэг тарааж байгаа. Үүнийг хүний хөрөнгийг дээрэмдсэн тэр этгээдүүд явуулж байна. Улаан цагаан гэмт хэргийн шинжтэй үйлдлийг шалгахгүй олон удаа хааж байсан. Хуулийн байгууллагууд нь өөрсдөө оролцоотой байна гэсэн үг. Тийм учраас энэ асуудлыг өөрийн бүрэн эрхийн хүрээнд анхааралдаа авч, хяналт шалгалтаар илэрсэн асуудлыг бүгдийг нь шилжүүлсэн. 10-аад жилийн өмнөх ханшаар бараг 10 гаруй сая ам.долларын хөрөнгө оруулалттай асуудлыг хуулийн байгууллагын олон албан хаагч үгсэн хуйвалдаж, хөрөнгийг нь дээрэмдсэн байх боломжтой асуудал тогтоогдоод байна" гэлээ.
