Газрын тосны эрэлт буурах эрсдэл нэмэгдэж, үнэ нь сүүлийн 3 сарын доод түвшинд тогтворжив

WTI төрлийн газрын тосны үнэ баррель нь 76 ам.доллар болж буураад байна.

Сүүлийн хоёр арилжаа дараалан долоон хувиар буурсан газрын тосны үнэ сүүлийн гурван сарын доод түвшинд хүрч тогтворжоод байна. Энэ нь зах зээлд эрэлт сулрах эрсдэл байгаагийн дохио боллоо.

Лхагва гарагт брент төрлийн газрын тосны үнэ эргэн баррель нь 80 орчим ам.доллар дөхсөн ч долоодугаар сараас хойш анх удаа энэ цэгээсээ доод түвшинд арилжааг хаагаад байна. Үүний зэрэгцээ WTI төрлийн газрын тосны үнэ баррель нь 76 ам.доллар болж буураад байгаа юм. Газрын тосны үнэ сүүлийн гурван долоо хоног ийнхүү эрчимтэй буурсан нь зах зээлд эрэлт багасах эрсдэл өндөр байгааг илтгэж байна. Газрын тосны импортоор тэргүүлэгч БНХАУ-д нөөц нь эрс нэмэгдсэн зэрэг суурь хүчин зүйлс мөн үнийн хөдөлгөөнд жин дарж байгаа аж.

Лхагва гарагт АНУ-ын хөрөнгийн захад хувьцаануудын ханш найм дахь өдрөө өсөлтөө хадгалсан бол пүрэв гарагт Азийн хувьцаануудын ханш өсөлттэй байна. Үүнд АНУ-ын Төв банкны бодлогын хүү оргилдоо хүрсэн, дахин өсөх орон зай байхгүй гэх таамаглал нэмэгдсэн нь нөлөөлж байгаа ажээ.

Эх сурвалж: gogo.mn