"Аймаг, сумын Засаг дарга нар нүүрсний тээврийг зогсоох шийдвэр гаргаж байгаа нь экспортод сөргөөр нөлөөлж байна"

Сангийн сайд Б.Жавхлан Засгийн газрын хуралдааны дараа мэдээлэл хийлээ.

Тэрээр" Монгол Улсын экспорт нэмэгдэж байна. Экспортыг улам нэмэгдүүлэхийн тулд боомт руу чиглэсэн хэд хэдэн арга хэмжээ авахаар боллоо. Боомт бүрийн нөхцөл өөр байна. Биржийн арилжаа дорвитой нэмэгдэхгүй байгаа. Энэ нь хил дээр нүүрсний овоолго үүсгээд байна. Нүүрсний уурхай эзэмшигч дотоодын хөрөнгө оруулагч нараас тээврийн зардал, НӨАТ, АМНАТ-ыг тооцох эх үүсвэрийг эргэж харахыг удаа дараа хүсэж байгаа. Үүнийг судлаад эргэж танилцуулах үүрэг авлаа.

Аймгийн Засаг дарга бүр сумын хэмжээнд экспортын замуудыг хаах шийдвэр гаргаж байгаа нь экспортод нөлөөлж байна. Энэ нь зам нь стандартын шаардлага хангахгүй байгаатай, мөн тээвэрлэлтийн горим алдагдаж байгаа шороо тоос ихээр босгож иргэдийн эрүүл мэндэд сөрөг нөлөө үзүүлж байгаатай холбоотой. Ийм шалтгаанаар тухайн тээвэрлэлтийг зогсоох шийдвэр гаргасан байдаг. Цаашид тээвэрлэлтийнхээ хяналтыг нь сайжруулахыг Зам тээврийн сайдад үүрэг болгож, хөдөлгөөнийг яаралтай нээхийг даалгасан. Мөн холбогдох аймаг, сумдад үүрэг өгсөн.

Өнгөрсөн долоо хоногт АНУ-ын ерөнхийлөгч Доналд Трамп татварын шинэ бодлогоо танилцуулсан. Үүний хариуд Хятадын талаас хариу 34 хувийн татварыг АНУ-ын бараанд ногдуулаад байгаа юм. Олон улсын энэ харилцаа манай улсын эдийн засагт нөлөөлнө. Манай улсад төдийгүй дэлхий нийтэд эдийн засгийн хүндрэл, сорилт авчрах дохио гэж ойлгож болно.

Төсвийн орлогын гүйцэтгэл 90-95 хувьтай байна. Жилд 450 тендер зарладаг байсан бол энэ жил 42 тендер л зарлаж байгаа" гэлээ.