Сөүл хотод 117 жилийн дараа 18 см зузаан цас оржээ
Өмнөд Солонгосын нийслэл Сөүлд энэ долоо хоногийн Лхагва гарагт 11-р сард орж байгаагүй хамгийн их цас оржээ. Энэ нь замын хөдөлгөөнд саад учруулж, цахилгаан тасалдуулж, хэдэн зуун нислэг цуцлагдахад хүргэсэн байна. Мөн ойрын өдрүүдэд дахин цас орох төлөвтэй байгаа аж.
БНСУ-ын нийслэлийн зүүн хэсэгт хурдны зам дээр болсон зам тээврийн ослоос болж хоёр хүн амиа алджээ. Мөн хүчтэй салхины улмаас барилга, барилгын талбайнуудаас унасан зүйлс Сөүлд зарим явган зорчигчдыг гэмтээсэн байна.
Хойд баруун зүгээс хүйтэн агаар нэвтэрснээр шөнөдөө бороо цасан шуурга болж хувирч, өдрийн 15 цагийн байдлаар 18 см (7.1 инч) цас орсон нь 1907 оноос хойш тэмдэглэгдсэн хамгийн их хэмжээний цас байв гэж цаг уурын агентлаг мэдээлжээ.
Дотоод хэргийн яам гамшгийн хариу арга хэмжээгээ нэмэгдүүлэн, Пүрэв гарагийн өглөө хүртэл цагт 5 см цас орно гэж урьдчилан таамагласан бөгөөд цасанд их хэмжээний чийг агуулагдаж байгаа нь байгууламж, эд хөрөнгөнд учирч болзошгүй хохирлын эрсдэлийг нэмэгдүүлж байгааг анхааруулжээ.
Цаг агаарын таагүй нөхцөл, хүчтэй салхины улмаас 200 гаруй нислэг цуцлагдаж, ихэнх нь дотоодын нислэг байв. Мөн 70 гаруй завьны үйлчилгээг түр зогсоожээ.
Сөүл болон төв бүсийн хэд хэдэн хэсэгт мод унаж, цасны улмаас цахилгааны шугам эвдэрснээс болж мянга гаруй айл өрх цахилгаангүй болсон тухай мэдээ гарсан байна.
Эх сурвалж: Reuters
