Дайны бүсээс 91 иргэнээ эх оронд нь авчирлаа
Ойрхи Дорнодод үүсээд буй зэвсэгт мөргөлдөөний улмаас зарим улс орон агаарын хилээ хааж, олон улсын нислэгүүдийг хязгаарлаад байгаа билээ. Үүнтэй холбоотойгоор олон улс орнууд тухайн бүс нутагт байгаа иргэдээ татан авах ажиллагааг эхлүүлээд байна.
Сүүлийн өдрүүдэд цэргийн ажиллагаа явагдаж буй бүс нутагт зөвхөн хүмүүнлэгийн болон нүүлгэн шилжүүлэх тусгай үүргийн нислэгүүд үйлдэгдэж байгаа юм.
Монгол Улсын Засгийн газрын шийдвэрийн дагуу үндэсний агаарын тээвэрлэгч МИАТ – Монголын иргэний агаарын тээвэр Улаанбаатар–Дубай–Улаанбаатар чиглэлд тусгай үүргийн нислэг үйлдэж, дайны эрсдэлтэй бүсэд байсан 91 Монгол иргэнийг эх оронд нь амжилттай авчирлаа.
Тус ажиллагаанд МИАТ компанийн 23 хүний бүрэлдэхүүнтэй нислэгийн баг оролцсон бөгөөд нүүлгэн шилжүүлэх ажиллагааг United Arab Emirates Air Force болон тухайн улсын иргэний нисэхийн байгууллагуудтай хамтран зохион байгуулсан байна.
Энэхүү ажиллагаа нь Монгол Улсын иргэдийн амь нас, аюулгүй байдлыг хангах зорилготой яаралтай нүүлгэн шилжүүлэх ажиллагаа байлаа.
