Төрийн 21 албан хаагч авлигын гэмт хэрэгт холбогдон ял авахаар боллоо
Афганистаны төрийн 21 албан хаагчтай холбоотой авлигын гэмт хэрэг шүүхэд шилжсэний дараа ял авах нь тодорхой болжээ.
Херат хотын Захирагч Абдул Вахид Катали, Нийтийн эрүүл мэндийн газрын дарга Абдул Хаким Тамана, бүс нутгийн зөвлөлийн гурван гишүүнээс гадна хэрэгт холбогдох бусад төрийн албан хаагчийн хэргийг Тусгай Прокурорын албанаас шүүхэд шилжүүлжээ.
Эдгээр албан хаагчид нь Афганистаны Covid-19 цар тахалтай тэмцэх ажиллагаанаас мөнгө завшсан хэргээр шалгагдаж, прокуророос шүүхэд онц ноцтой авлигын хэрэг үйлдсэн гэдгээр шилжүүлсэн байна.
Тус албан хаагчид нь 20 сая афгани буюу 260 гаруй мянган ам.долларыг Covid-19 цар тахалтай тэмцэх хөтөлбөрийн төсвөөс завшсан бөгөөд Тусгай Прокурорын албанаас мөрдөн шалгалт хийсний үр дүнд ял оногдуулахаар шүүхэд шилжүүлсэн талаар Ерөнхий Прокурорын газрын Хэвлэлийн төлөөлөгч Жамшид Расули мэдээлэв.
Мөн өмнө нь Ерөнхийлөгчийн мөрдөн шалгах агентлагаас төрийн албанд ажилладаг болон ажлаас гарсан 44 иргэнийг авлига, Covid-19 цар тахалтай тэмцэх хөтөлбөрийн төсвөөс хөрөнгө завшсан хэрэгтэй холбогдуулан Ерөнхий Прокурорын газарт ханджээ.
