“Үхлийн уршигт” өдөр хоног айсуйг Трамп анхааруулав

“Үхлийн уршигт” өдөр хоног айсуйг Трамп анхааруулав

 

Зарим бүс нутагт хиймэл амьсгалын аппаратын дутагдал нүүрлэсэнтэй уялдан хүнд өвчтнүүдийн дунд эндэл ихсэх магадлалтайг муж улсуудын захирагч, эрүүлийг хамгаалахын албаны хүмүүс анхааруулж байна. Ирэх нэгээс хоёр долоо хоногт АНУ-д коронавирусийн халдварын улмаас эрсдэх хүмүүсийн тоо дэлхийн дайны үеэр амь үрэгдэгсдийн тоотой жишиж болохуйц өснө хэмээн Ерөнхийлөгч Дональд Трамп анхааруулав. “Харамсалтай нь үхлийн айхавтар уршигт үе эхэллээ” хэмээн Трамп бямба гарагт Цагаан ордонд сэтгүүлчдэд тайлбарласан юм. Халдварын оргил үед эндэх хүмүүсийн тоо “урьд өмнө үзэгдэж дуулдаагүй их, магадгүй дэлхийн I, II дайны үеийнх шиг хэмээнд хүрч болзошгүй.” Ойрын хэдэн долоо хоногт чухам хэдэн хүний амь үрэгдэхийг тооцсон тодорхой тоо Трамп дурдаагүй. Засгийн газар халдварын эсрэг шийдмэг дайчин арга хэмжээ авахгүй бол доод тал нь 200 мянган америк хүн вирусийн улмаас эндэх тооцоог өнгөрсөн долоо хоногийн эхээр Трампын засаг захиргаа мэдэгдэж байсан юм. Зарим газар хиймэл амьсгалын аппаратын дутагдал нүүрлэсэнтэй уялдан хүнд өвчтөнүүдийн дунд эндэл ихсэх магадлалтайг муж улсуудын захирагч, эрүүлийг хамгаалахын албаны хүмүүс анхааруулж байна. Халдвартай хүмүүсийн тоо хурдацтай өсөж байгаа нь эмнэлгүүдэд дарамт учруулж, ялангуяа Нью-Йорк хотод өвчтөний эмчилгээ сувилгаа, нэн шаардлагатай хэрэгслийн хангамж нийлүүлэлт хүндэрлээ. Холбооны засаг захиргаа аль болох олон хүний амь аврах, нэн шаардлагатай муж улсуудад амьсгалын аппарат шуурхай нийлүүлэхийн төлөө ажиллаж байгааг Трамп мөн тайлбарлав. Ням гарагийн байдлаар АНУ-д 300 мянга гаруй хүн вирусээр халдварлаж, 8,000 гаруй хүн халдварын улмаас эндээд байгааг Жон Хопкинсын их сургууль тооцоолжээ. Нью-Йорк, Детройт, Чикаго зэрэг хотод эндэгсдийн тоо ихэссээр байгаа нь засаг захиргааг түгшээж байна. Эрх баригчид өвчлөл нэмэгдэх хандлагатай Нью-Жерси, Пенсильвани, Колорадо, Коннектикут, Род-Айленд муж улс, Колумбийн тойргийн нөхцөл байдлыг анхааралтай ажиглаж байгааг мэдэгдлээ. Бусдаас зай барих, олон хүн цугласан газраас дөлөх удирдамжийг хатуу мөрдөх замаар “хүн бүр чадах бүхнээ хийх цаг” гэдгийг Цагаан ордны вирустэй тэмцэх тусгай хүчний координатор Дебора Биркс онцлон анхааруулав. Бусдаас зай барих арга хэмжээний үр дүн гарч зарим бус нутагт өвчний тохиолдол хэдийн буурч эхэлснийг тэрбээр мөн мэдэгдсэн. Ирэх хэдэн долоо хоногт нэмэгдэх тохиолдол нь өнгөрсөн хэдэн долоо хоногт хэдийн вирус халдварласан хүмүүсийн илрэл гэдгийг тэрбээр мөн тайлбарласан юм. Ирэх хэдэн долоо хоногт учрах үхэл зовлонд нугарахгүй байгаарай хэмээн дэд ерөнхийлөгч Майк Пенс америкчуудыг зоригжууллаа.

Засгийн газрын мэдээ

Хуваалцах:

Сэтгэгдэл

reload, if the code cannot be seen