Дорнод аймгийн Цагаан-Овоо суманд дотуур байр, Баяндунд дунд сургууль барьж байна

Дорнод аймгийн Цагаан-Овоо суманд ерөнхий боловсролын сургуулийн 150 хүүхдийн ортой дотуур байрны барилга, Баяндун суманд 160 хүүхдийн суудалтай бага сургуулийн барилга ашиглалтад орно.

Боловсролын яам, Боловсролын ерөнхий газар, Барилгын хөгжлийн төвийн хамтарсан ажлын хэсэг Дорнод аймгийн Боловсролын газар, Газрын харилцаа, барилга, хот байгуулалтын газрын төлөөлөлтэй хамтран сумдуудад ажиллаж эхэлсэн бөгөөд энэ сарын 11-ний өдөр Цагаан-Овоо, Баян-Уул, Баяндун суманд ажилласан байна.

Цагаан-Овоо суманд баригдаж буй ерөнхий боловсролын сургуулийн дотуур байрын барилгын ажлын явцтай танилцаж гүйцэтгэгч “Өндөр баганат” ХХК-д үүрэг даалгавар өгч, ажлын явцыг түргэсгэх, гүйцэтгэлд гарсан алдаа зөрчлийг арилгаж, энэ онд багтаан ашиглалтад оруулах үүрэг даалгавар өгчээ. 

Баян-Уул суманд баригдаж буй ерөнхий боловсролын сургуулийн 160 хүүхдийн дотуур байрын барилгын ажлын явц 70 хувийн гүйцэтгэлтэй, технолгийн зогсолт хийсэн байна. Барилга угсралтын ажлын явцтай танилцаж, гүйцэтгэгч “Дорнын оч” ХХК-д үүрэг даалгавар өгч, барилгыг 2025 оны долоодугаар сард ашиглалтад оруулах чиглэл өглөө.

Баяндун суманд баригдаж буй 160 хүүхдийн суудалтай бага сургуулийн барилгын ажлын явцтай танилцаж гүйцэтгэгч “Дуутын нуруу” ХХК-д үүрэг даалгавар өгч, ажлын явцыг түргэсгэх, гүйцэтгэлд гарсан алдаа зөрчлийг арилгаж, энэ онд багтаан ашиглалтад оруулах үүрэг даалгавар өгсөн гэж Боловсролын ерөнхий газраас мэдээлэв.