Бухимдлыг үргээх “ИНЭЭД”-ийг тэд бэлэглэнэ
"ЗАХИАЛГАТ ИНЭЭД”-ийн залуусын "АХ ДҮҮ ГУРАВ” уран сайхны кино энэ сарын 12-нд Тэнгис кино театрт нээлтээ хийлээ.
ҮЙЛ ЯВДАЛ: "Кастер” хэмээх хочит ноён Баянаа бол монголын нэгэн тэрбумтан. Амь насанд аюултай хүнд өвчин туссан тэрээр өв хөрөнгөө хүүхдүүддээ өвлүүлэх тухай бодолд дарагдах болно. Залуу насандаа алдаж онож явсан тэрээр гурван өөр эхийн, гурван өөр хүүхэдтэй. Гэвч тэрээр гурван хүүхдээ одоо хаана байдгийг ч мэдэхгүй, хэнийх нь ээжтэй амьдралаа холбож байсангүй. Тийм учраас өөрийн үнэнч туслах болох Чулуунаад гурван хүүхдээ олж авчрах хүндхэн даалгаврыг өгнө. Харин Чулуунаа энэ даалгаврыг биелүүлэхээр "АЖИЛ”-даа орно.
КИНО ЭХЭЛЛЭЭ: Монголоо /Жүжигчин Адъяа/ Баялагаа /жүжигчин Мөөжиг/ нар хөөцөлдсөөр цагдаагийн газарт ирнэ. Энд Хашираа алба хаах бөгөөд төрд зүтгэж буй мань эр "албан тушаал”-аа бас ашиглана. Харин нөгөө талд Кастер хочит баян эр далай дунд зогсох бөгөөд хажууд нь нарийн бичиг бүсгүй, туслах Чулуунаа нар байлцана…. Эндээс үйл явдал өрнөнө.
ТӨГСГӨЛ: Тэр бол мэдээж аз жаргалтай.
Нэмж хэлэхэд, адал явдалт, инээдмийн энэ сайхны киноны зохиолыг Ө.Мөнх-Эрдэнэ бичиж найруулсан бол Х.Манлайбаатар продюсер, С.Баттулга II найруулагчаар ажиллаж, гол дүрд "Захиалгат Инээд” хамтлагийн Мөөжиг, Манлай, Адъяа, аавын дүрд АЖ Г. Мягмарнаран нар тоглосон юм.
